Ka lympung yaleh Basketball wa da e naam hei pyrtuid ka (L) Lily Mary Laloo kawa da pynman da ka Seng Samla CMC Iawmusiang-Khimusniang chirup i yakrehlang ka Salesian Youth Movement da sdang ka ynne ka sngi ha Joseph Nardiny Seminary Ummulong, West Jaiñtia Hills District.
Ya kani ka lympung yalehke da wan wow wai da u Montri ka chnat Sport & Youth Affairs ka sorkar jylla, u Wailadmiki Shylla kam u kongsan deiwa emlang u Khroobok Passah, DSO West Jaiñtia Hills, u Fr. Anthony Kharkongor (SYM), u Most Rev. Ferdinand Dkhar, Bishop Jowai Diocese, u Fr. Lambert Dkhar, Rector Joseph Nardiny Seminary Ummulong, u Fr. Lawrence R Paswet DYD, kiwa ha-yung ha-sem ka (L) Lily Mary Laloo, ki President wa Secretary ka Seng Samla Parish, President wa Secretary Seng Longkmie Parish, Chairman wa Secretary ka Parish Pastoral Council Jowai wa Ummulong, President wa Secretary ka Seng Samla Parish Ummulong najrong kiwa chah khut sñiawbha.
U Wailadmiki Shylla hawa klam da yaroh u ya ka Seng Samla hajrong i pynman ko ya kam kani ka Tournament, wei da pyn-eh-daw haroh u ya kiwa yalehke u lehbha ki.
Da kyntu haroh u ya kiwa yalehke wow pynkhreh bha ki ha kani ka jait yalehke neibhah wa man ko leh ka laad ka kabu ya ki neibhah wa ha u snem 2027 daw poi ka National Games ha kani ka jylla.
Ha kani ka sngi sdang ka yalehke i yakhun da man hapyrdi ka JNR B pyrchah ya ka Wizard, heiwa ka Wizard da jop ko da 51-39.
Discussion about this post