Ka T-20 Open To All Cricket Tournament wa pynman daka All Jaintia Cricket Association, da sdang yaka ynnin ka sngi ka 11 tarik ha madan Jrisaleiñ, Jowai. Ya kani ka Tournament da wan wow wai da u Arwotki Sumer, uwa man u Apex Council Member yong ka Meghalaya Cricket Association hei emlang u President ka AJCA, u Eddystone Shylla, u General Secretary ka AJCA, u Issaia Muksor wa kiwi tawon ki dkhot yong ka AJCA.
Da wan wow chimbynta kamwa 10 tylli ki Team kitæ ka Moodymmai, Hills United Cricket Club, Khimusniang, Khliehtyrshi Sport Club, 4-Mowkaiaw United, Chutwakhu, Rising Star, Ummulong, Lion Sports & Youth Affairs (LSAYA) wa ka Umshangiar.
Ka yalehke wa nyngkong haka 11 tarik man ko hapyrdi ka Umshangiar wa ka Lion Sports & Youth Affairs (LSAYA), tangwa ya kani ka yalehke ym ye u pyndep neidaw wa pynthut u slap. Ya ka yakhun wa dang sah u pyndep ha kani ka 13 tarik heipor 9:00 waje i step. Ha kani ka yalehke da jop yaka kylla khlem da ka Lion Sports & Youth Affairs (LSAYA) wei da jied chwa ko wow kawang bol. Ka Umshangiar da kamai ko 233 Run na ki 20 Over deiwa dooh 5 Wicket heiwa u Marshal Pariat da yoh u 100 Run. Hawa beh ya ka thong, ka Lion Sports & Youth Affairs (LSAYA) da kamai ko 54 Run deiwa dooh 3 ngut tangwa heini i por da haap u slap kamtæ da hap noh wow pynsangeh yaka yalehke.
Ynne ka sngi won da pynman artylli ki yalehke heiwa da jop ka ka Rising Star waka Hills United Cricket Club.
Ha ka yakhun wa nyngkong hapyrdi ka Rising Star waka Chutwakhu heipor 9:00 waje i step, ka Rising Star da ye ko u pynrem yaka Chutwakhu da 60 Run. Ha kani ka yalehke, ya ka kylla khlem da jop da ka Rising Star wei da jied ko wow Bat nyngkong heiwa da kamai ko 167 Run na ki 20 Over deiwa dooh ko 7 Wicket. U Deep Das da kamai u 33 Run (2×4 wa 4×6), u Sanki Pakyntein 28 Run (1×4 wa 3×6), u Unipaia Pala yong ka Chutwakhu da yoh u 3 Wicket na ki 4 Over. Ka Chutwakhu hawa beh yaka thong da ye ko u kamai du 107 Run na ki 20 Over deiwa dooh ko 6 Wicket. U Womphermi Rymbai da kamai u 27 Run (4×4), u Heimonmi Nongpluh won da kamai u 26 Run (4×4 wa 1×6) katwa u Firstborn Dkhar yong ka Rising Star da yoh u wow pynhaap 3 Wickets na ki 4 Over.
Ka yakhun wa ar yong ynne ka sngi da pynman hapyrdi ka Hills United Cricket Club wa ka Khliehtyshi Sports Club, heiwa ka Hills United Cricket Club da jop ko yaka Khliehtyrshi da 60 Run. Ya ka kylla khlem da jop da ka Hills United Cricket Club wei da jied ko wow Bat nyngkong.
Ka Hills United Cricket Club da ye ko wow kamai 190 Run na ki 20 Over deiwa dooh ko 4 Wicket. U Mewada Shylla da kamai u 89 Run (7×4 wa 9×6), u Defender Dhar da kamai u 27 Run (3×4 wa 2×6), katwa u Ebormitre Sutnga da kamai u 25 Run (4×4 wa 1×6). Ka Khliehtyrshi Sports hawa beh ya ka thong da ye ko u kamai 130 Run na ki 20 Over deiwa dooh noh ko 7 Wicket. U Conard Sana da kamai u 42 Run (6×4). U Chanmi Ryngkhlem yong ka Hills United Cricket Club da khur u 4 Wicket na ki 4 Over katwa u Phermon Dkhar won da yoh khur u 2 Wicket na ki 4 Over.
Ki yalehke u pteiñ ki ha kani ka 15 tarik heipor 9:00 waje i step hapyrdi ka Ummulong wa ka Lion Spots & Youth Affairs, katwa ka yakhun wa bood won toh hapyrdi ka Khimusniang pyrchah yaka 4-Mowkaiaw United.
