Ka JSU Demthring Unit da sdang ko ya ka lympung yalehbol ha chnong Demthring ha Ksehmadan heiwa da wan wai ya ka da u MLA warim ka Amlarem Constituency, u Stephenson Mukhim ha i emlang u symbood kongsan, u Treiborlang R Suchen uwa man leh kam u General Secretary ka JSU seiñbei ryngkat u President ka seiñ, u Jersom Shylla kam uwa chah khut kyrpang.
Ha kani ka sngi wa sdang kani ka lympung da emlang ryngkat ki dkhot ka JSU seiñbei wei ya ka yalang da pynlai da u President ka JSU Demthring Unit u Ryngkat Diengdoh.
Ya kani ka lympung da pynman kam ka dak wow lehkmen yei dap 50 snem ka jylla ha u snem wow wan heiwa u Jersom Shylla hawa e i klam da sneiñ wei da e mynsien u ya ki dkhot ka chnat ka JSU wei kamjooh da e mynsien u ya kiwa yalehke na ki dhab waphær waphær.
U Treiborlang R Suchen ha i klam da ong u wa ka seiñ da kreh chitom ko chirup wa kiwa kitkaam ka WJDSA wa EJDSA wow yaleh u wanrah chi-bhah ka National Games hapoh Ri-loom Jaiñtia wei hadien i yachem wa u Montri Rangbah ka jylla ha ki bnai wa dadep da kular u leh wow e bhah wow wanrah ya ka madan kawa paka wow pynman ya kani ka lympung yalehke wa heh dooh ka ri.
Kam u kongsan ha kani ka sngi, u Stephenson Mukhim hawa e yei klam da yaroh u ya ka seiñ wa da pynman ko ya kani ka lympung kawa pynchlur ya ki khynnah khynroo wow wan ki chaphrang wow chimbynta ha kam kani ka lympung. Da ong u leh wa kam u MLA ha ki snem wa dadep da yaleh u katwa ye wow pynmiat ya ki madan yalehbol ha ka Constituency kamjooh leh ha chnong Demthring neibhah wa ki khynroo yoh myntoi bha ki na ki madan.
Ha kani ka sngi ka yalehke wa nyngkong, ka Tylliiong I FC da jop ko ya ka United FC lyngba ka Freekick na u Wanki Sapuh haka 26 minit.
