Ynnin ka 11 tarik, ka Seiñraij Niamtre Ummulong da wai ko ya ka 1st Carrom Board Competition (Men’s Double) 2022 ha Yung Walieh yong ka hi heipor 3 waje i janmiet, heiwa u Khroobok Passah, District Sports Officer yong ka West Jaiñtia Hills District da man u kam u kongsan.
Ha kani ka yalang wa tbian, u President ka Seiñraij Niamtre Ummulong, u Mul Passah da man u kam u chongknor wow pynlai ya ka yalang, heiwa u General Secretary ka Seinraij Niamtre Ummulong, u Embhahlang Rymbai da e u ya ki kyntien tbian, da pynsñiaw u leh yei thmu yong ka Seiñraij Niamtre Ummulong hei wow pynman ya kani ka yalehke.
Neiliang u kongsan won da e u i yaroh yaka Seiñraij Niamtre Ummulong, da ong u wa ka Seiñraij Niamtre Ummulong da man sakhiat ko kawa phær na kiwi tawon ki Seiñraij kiwa em cha kiwi ki thaw, neibhah man ko kawa chynna jngai ya ka mynried yong ki khon khynroo khyllood yong ka chnong ka thaw deiwa pynman ya kam kini ki yalehke wa boon jait heiwa ki khynroo khyllood da yoh ki u ya chimbynta khnang yow lait ki na ki kaam wa sih.
Ha chwa wow kut ka yalang, neiliang u Secretary ka Sports and Games Committee yong ka Seinraij Niamtre Ummulong, u Sainborlang Rymbai won da e u ya ki kyntien e khublei ya waroh kiwa wan sakhi lang, kiwa e yarap sñiawbha kamjooh ya kiwa ya chimbynta waroh.
Hajrong ini, da pyntip u leh wa lada em kiwon kiwon ki bru kiwa sñiaw kwah u ya chimbynta ha kani ka yasait Carrom dang pdiang ya ki, wei ye wow Phone ha kni ki Number 6009975687 lane ha u 7085853884.
