Ki kynthai ka Meghalaya da sdang ki yei lai e reiñ ha ka Women’s Senior One Day Trophy deiwa jop da 5 Wicket pyrchah ya ka Sikkim ha Kolkata iwa pynman ha Eden Gardens ynne ka sngi.
Ka Meghalaya da jop ko ya ka kylla khlem wei da jied ki wow phah Bat nyngkong ya ka Sikkim. Arngut na kiwa Bat ka Sikkim da yoh tam ki ya ka 50 Run, tangwa kiwa kawang bol ka Meghalaya da ye ki wow pynneh yei kamai Run hapoh 4 Run chi Over heiwa da pynkut yei kamai Run da 181/6 na ki 50 Over.
Ka Ajima Sangma da ka bol da yoh ko da 2/42, heiwa kawi na kiwa yoh ko wow pynhaap toh kawa yoh u kamai 50 Run. Ka Daiaka Warjri (1/14), ka Debasmita Dutta (1/24) waka Pinky Chanda (1/30) toh kiwi kiwa da yoh Wicket.
Ka Meghalaya hawa Bat da dooh ko ar Wicket hapoh 10 Over, tangwa ka Neha Hajong (15) waka Guest Player ka Rajni Lodhi (68) da kamai ki wer wer hadooh 13.1 Over chwa wow haap ka Hajong. Ka Lodhi (kawa dat 7 tylli ki 4 Run) da yoh lok ko waka Captain Dutta (kawa dat 8 tylli ki 4 Run) kiwa da kamai lang 93-Run.
Ha wakut, ka Lodhi da haap ko ha ka bol wa nyngkong ka 47 Over deiwa ka Meghalaya dang emkaam ko sa 22 Run yow jop. Pyn ha ka Over wa bood ka Meghalaya da dooh ko sa kawi ka Wicket (kawa san) tangwa ka Dutta da neh ko hadooh wa kut deiwa yoh 62 Run deiwa yoh lok waka Riticia Nongbet (8 Not Out) da pynjop ko yaka Meghalaya deiwa sah sa chi bol donhi.
Ka Meghalaya kattu daw yachem ko waka Bihar ha kani ka 31 tarik.
