Ka Seng Khasi Seng Kmie ynne ka sngi da sdang ko ya ka ‘Nohkjat’ yong ka Shad Suk Mynsiem kawa jooh pynman manla u snem kam ka dak wow e ngooh ya u Blai hadien wa dadep thung khnang wow biang i rep i riang wei wow roi i kamai wei ya kani ka chaad da pynman ha Madan Weiking, Jaiaw.
Ya kani ka Shad Suk Mynsiem ka wow neh hadooh 3 sngi lynter kawa pynman da ka Seng Khasi Seng Kmie daw pynkut ha ka 12 tarik uni u bnai heiwa daw bood thij ya ki kyndon wow yada na u COVID-19.
Ha kanI ka sngi da sakhi wa em kajiak ngut kiwa chimbynta ryngkat i sur ka ksiñ, ka bom wa ka bhuri deiwa sap ya ki riam tynre ryngkat ki ksiar ki rupa wa ki poila.
Hawa yaklam wa u General Secretary ka Seng Khasi Seng Kmie u PD Nongrum da ong u wa katkam wa phah ki bor sorkar wa ki bor District da hap pynkrehkaam noh ya ki kyndon wei wow chah du 75 na ka 100 ngut kiwa chaad ha kawi ka kynta neibynta kawi ka dhab wei hadien chi kynta won daw chah won sa chi bhah wei kamtæ ter ter.
Neiliang u Paia B Synrem, Assistant Secretary Seng Khasi Seng Kmie da ong u wa da dooh thiah ha u snem wa dadep neidaw u COVID-19 neidaw wym yoh u pynman ya ka Shad Suk Mynsiem kam ha kiwi ki snem nadooh wa sdang ya ka ha u snem 1911 ha Madan Weiking. Wei neiliang yong ki da pynkhreh ki wow bood top pa top ya ki kyndon ki adong ka sorkar wei kyrmen skem wa ha kini ki ar sngi wow wan leh u man ko kawa lai bait lai ryntih.
Heiyatoh wa i wym bood de ki paidbah ya ki kyndon wow yada na ka khlam COVID-19 kamwa da yoo heipor wa yalap Election MDC ha Garo Hills wa kiwi ki tamasa, neiliang u Paia da ong u wa ymye u ong iwon iwon hajrong itæ, wei hawa ka sorkar lyngba ki bor District da ebor ko, kamtæ ka Seng Khasi leh da phah ko ya kiwa wan chimbynta wow bood ya ki kyndon ki bor District.
