Ka Rising Star da rah ko yei nam Champion yong ka lympung yalehke Open to All T20 Cricket Tournament 2021 wa da pynlai daka All Jaintia Cricket Association wa pynman ha madan Jrisaleiñ ynne ka sngi.
Ha ka yakhun Final, ka Rising Star da yachem ko yaka Umchangiar heiwa da jop ko da ka Super Over
Ya ka kylla-khlem da jop da ka Rising Star wei dajied ko wow Bat nyngkong.
Ka Rising Star ka da kamai ko 139/6 na ki 20 Over heiwa u Dawanroy Nongpluh da kamai u 51 Run (7×4 wa 2×6), u Daymeniv Shullai 21 Run (2×4 wa 1×6). U Heisar Bareh yong ka Umchangiar da yoh u wow pynhaap 3 Wicket na ki 4 Over wa u Heipormi Laloo 2 Wicket na ki 4 Over.
Ka Umchangiar hawa beh yei thong da ye ko u kamai thij 139 Run na ki 20 Over deiwa dooh ko 9 Wicket. U Satemitre Bareh da kamai u 56 Run (9×4), u Kuneki Lato won da kamai u 19 Run (2×4 wa 1×6). U Peterson Lamare yong ka Rising Star da yoh u pynhaap 3 Wicket na ki 4 Over. U Kyrmen Suchiang wa u Sanki Pakyntein won da khur ki mar 2 Wicket samen na ki 4 Over.
Neidaw wa waroh arliang da kamai ki mar i jooh itæ 139 Run na ki 20 Over, kamtæ da hap wow pynyakhun da ka Super Over, heiwa ka Umchangiar hawa Bat nyngkong ha ka Super Over da kamai ko 8 Run. Ka Rising Star hawa beh ya ini, da yoh ko 9 Run na ki 5 bol yong ka Super Over, wei da yoh ko u rah yei naam jop.