Ka Skill Mela wa ar sngi wa pynman da ka Meghalaya State Skills Development Society (MSSDS) hapoh yong ka Labour Department ka jylla ynne da sdang ko ha Kiang Nangbah Government College Auditorium, Jowai wei da wan wai ya ka da u MLA ka Jowai uwa man leh kam u Chairman MCCL, u Wailadmiki Shylla hei emlang u Executive Director, MSSDS, ka ADC, West Jaiñtia Hills District waka Principal yong ka Kiang Nangbah Government College.
U Executive Director, Shivansh Awasthi da pyntip uwa ka Skill Mela da pynman ya ka hapoh ka Skill Meghalaya Programme kawa da sdang da u Montri Rangbah ka jylla, u Conrad K Sangma ha u Wisu uni u snem. Da pyntip u wa ka Skill Meghalaya toh kawa da mang wow pynjanai ya i sap, wow pynchlur yei seiñ khih wei wow e kreh ya ki khynroo ha ka jylla. Kani ka thong krehkaam u kynjoh ko ya ki 1.2 lak ngut ki khynroo ha ki san snem wow wan.
Chooh chooh da pyntip u wa hapoh ki ynru bnai wa da sdang ya ka da em 34 tylli ki seiñ esikai wa da tipmit ka sorkar wow hikai ya ki 2595 ngut ki khynroo khyllood ha ki 14 bynta wa 35 jait ki jait khih (Trades) ha ki 44 tylli ki Training Centre ha ki 12 District.
U Wailadmiki Shylla hawa e yei klam da ong u wa ka Skill Development namo wow pynjanai ya i sap man i iwa emkaam bha wow pynkupbor ya ki khynroo ka jylla khnang wow ye ki wow yieñ ha ki kjat yong ki hi. Da ban joor u leh yeiwa emkaam wow pynchlur ya ki khynroo wow pynku ki ya i khayi pateiñ ha ka thaaiñ deiwa seiñ khih ki pyn ha chnong wa ka jylla.
Kani ka Skill Mela toh kawa ar sngi ka wow kyruiñ ha ki le bynta kam wow pynyajan ya kiwa thooh kreh wa kiwa e kreh lyngba ka Job Fair, wow e laad ya kiwa seiñ khih wow pynyoo rong ya ki tiar wa da chna ha kani ka thaaiñ lyngba ka Haat Bazaar wei kamjooh leh wow pyntip ya ki khynroo hajrong ki e sikai kiwa ye ki wow chimbynta wei kammon wow chah hikai ki.
Ha waroh em 45 tylli ki dukan kiwa kynthup ya 25 tylli ha ka Haat Bazaar heiwa da pynyoo ya ki tiar wa da chna na kani ka thaaiñ. Kiwa chah hikai ha ka Skill Meghalaya u chah hikai ki kam ha ka chna baam (Food Processing) wa kiwi kiwi wei da booh leh ya ki mar baam wa chna ki ha ka Haat Bazaar. Da em 10 tylli ki dukan ha ka Job Fair Section heiwa da em 10 tylli ki thaw e kreh naka jylla da wan ki kam ha ki kaam wa yatoh waka Banking, IT, Hospitality, Unarmed Security, Insurance, Sales, Services, Automobile wa Healthcare.
Kiwa chah hikai ha ka Skill Meghalaya ha Ri-loom Jaiñtia leh da chimbynta ki ha kani ka Job Fair wow Register wow yoh kreh. Kiwi tawon ki dukan toh yong kiwa e sikai kiwa da tipmit da ka sorkar.
Ka MSSDS da chimkhia ko wow pynku ya ka sap ki khynnah wei daw pynman ko ya kam kani ka Skill Mela wow pynkupbor ya ki khynroo ha kiwi ki thaw ka jylla.
