U Montri Rangbah ka jylla, u Conrad K Sangma ynne da wai u yei pyrchang nyngkong namo ka Pilot Project wa tip kam ka Payment for Ecosystem Services (PES) wow yada ya ki thaw mih um wa ki rood ka wah Ganol ha i lut wa T. 1.20 klur wei da saam u leh ya ki Cheque cha ki seiñ ki warep namo ki Producer Groups hapoh ka FOCUS hei emlang u Chief Adviser u Montri Rangbah, u Thomas A Sangma, u Govt. Chief Whip, u Marcuise N Marak, u Principal Secretary ka sorkar wa man leh kam u CEO ka MBDA, u P. Sampath Kumar wa kiwi kiwi ha Asanang, Rongram C&RD Block.
U Conrad hawa e i klam da ong u wa katni da sakhi wa da sdang stang ki khloo wei boon ki tyllong um da sdang raw ki wei ki bru ym dap de ki ya ka um.
Da ong u wa ka sorkar da sdang ko ya ka kreh wow pynbiang yeiwa emkaam hapoh jylla wei da sdang noh ya ka PES heiwa ka sorkar chirup wa ki Policy wa ki kaam daw yarap poisa ko leh ya ki bru kiwa chah ktah i khih i khan ki manda kylla ka rymaw. Ka sorkar daw krehlang ko chirup wa ki chnong wow wanrah i chaniah khnang wow ye u yada ya ka rymaw.
Da pyntip u wa ka sorkar da thmu ko wow em 4200 Square Kilometre ki Catchment Area namo ki thaw wa mih wa lang ka um ha kylleiñ ka jylla heiwa daw kyrchaan wei daw yarap ko ya ki paidbah lyngba ki chnat waphær waphær yow pynku yei imja ki.
Ha kani ka sngi da pynlait leh ya ka Inception Report wei da e ya ki Cheque cha ki 50 tylli ki Producer Group hapoh ka FOCUS.
Neiliang u Deputy Commissioner, u Ram Singh da e u ya ki kyntien pdiang burom ha kani ka sngi katwa u Additional Project Director ka CLLMP, u DB Gunanka, da e u ya ki kyntien khublei.
