Ynnin ka sngi da sdang ya ka 3rd T20 Cricket Tournament wa pynlai da ka Sports Social & Cultural Club Ummulong heiwa chwa u sdang da em ka yalang kawa tbian heiwa u Wailadmiki Shylla, MLA ka Jowai Constituency uwa man leh kam u Chairman ka MUDA da man u kam u kongsan hei emlang u Eddy Shylla, President ka WJDCA kam u symbood kongsan.
Ya ka yalang da pynlai da u President ka Ummulong Sports Club, u B. Siangshai, wei wa da yoh leh yei klam na u General Secretary ka Club, u J. Langmi Bamon uwa da khana yei thmu yong kani ka Tournament toh wow e laad ya ki khynnah ki khynroo yong kani ka thaaiñ u chimbynta u sai yei sap yalehke yong ki kamjooh leh yoh ki khynroo u lait na ki kaam sih kiwa pynsñiawsih ya ka imlang sahlang kamjooh leh yoh u yarap u pynmih poisa neibynta chiboon i emkaam ka Club.
Da yoh leh yei klam na u Chairman chnong yong ka chnong Ummulong, u Welly Muksor, da yoh leh yei klam i sneiñ i kroo na u symbood kongsan uwa da batai yei emkaam u yarap u pynku ya kani ka jait yalehke Cricket ha kani ka thaaiñ.
Da yaroh u leh ya ka Ummulong Sports Club kawa da ye u pynman kam kini ki jait Tournament man-u-snem kawa da ye u riñ ya ki khynroo u chimbynta.
U Wailadmiki Shylla da e u chiboon i sneiñ i kyntu ya kiwa yalehke wa yow poi cha ka thong toh deiwa kreh chitom wei wow pynpliah yei yalehke wei da khana u leh wa daw wanrah u ya ka Stadium ha ka thaaiñ yong i neibynta ka Cricket lyngba i krehlang waka West Jaiñtia District Cricket Association khnang wow ye u riñ chooh chooh ya ki khynnah cha kani ka jait yalehke.
Da pynkut ya ka yalang dei klam e khublei na u Vice President ka Club, u Amul Laloo.
Ha ka yalehke wa nyngkong hapyrdi ka West Jaiñtia Police pyrchah ya ka Blazing Spartan Legend, ka West Jaiñtia Police da jop ko da 74 Run.
Discussion about this post