Ka 1st Open to All Veteran Football Tournament 2023 wa pynman da ka East Jaiñtia Hills District Football Association (EJHDFA) da sdang ya ka ynne dei wan wai pyrda da u Coming One Joy Tlang uwa man kam u General Secretary ka EJHDFA deiwa emlang u waheh chnong ka Diengshynrum, u Wilbert Nongtdu ryngkat ki dkhot ka Association ha madan Artificial Turf wa em ha Diengshynrum hi.
Neiliang u kongsan hawa e yei klam da yaroh u yei smat ki waheh ka District waka jylla hi waroh wow chimbynta ha kani ka Tournament neibynta kiwa da em 40 snem chaneiñ wei da kyntu u leh ya kiwa yalehke wa da ih rta wow kyruiñ ki cha ki kaam yow man kam ki Coach wa ki Referee khnang wa ka mynried ka District waka jylla waroh kawi u ku ko ha ki kaam yalehbol.
Ynne ka sngi sdang da pynman ar tylli ki yalehke da ka 12 Dolloi FT waka Old Star FT kawa da jop da ka 12 Dolloi da 1-0 da ka kool wa thap u Golden Mukhim ha ka minit wa 27.
Ka yalehke wa ar won da pynman hapyrdi ka Ar Dolloi FT waka EJTOTA FT heiwa da jop ka Ar Dolloi da 3-1.
Ya ka Ar Dolloi da thap kool da u Swellmon Shylla haka minit wa 35 wa 41 wa u Erick Dkhar haka minit wa 52 katwa ya ka EJTOTA da thap da u Deolangki Dkhar haka minit wa 8.
Ki yalehke u pteiñ biang ki mynstep da ar tylli hapyrdi ka W. Narpuh VFT waka Diengshynrum SC heipor 11:00 waje i step wei daw pynbood da ka Para-I SC waka Sutnga Pohshnong SC heipor 1:00 waje i sngi.
Discussion about this post