I pynman yalang yalap Election yong ki seiñ saiñ pyrthai neibynta ka Election MP cha ka Lok Sabha da kut noh ko ynne ka 17 tarik heipor 4:00 waje i janmiet, iwa man leh 48 kynta hadooh wa kut i por thap Vote ha kani ka 19 tarik.
Nadooh ka 4:00 waje ynne i janmiet da sdang i sangeh noh ki kaam wa yatoh wa i yalap Election namo ka ‘Campaign Silence Period’ iwa mut wym chah de wow pynman yalang paidbah neibynta ka Election, i lai paidbah, i lai psiah cha ki thlu yung wei wow yachem bru.
Kam wow pynkynmoo wa da em 6 ngut ki kyrtong wow e reiñ na Shillong Parliamentary Constituency wei kini toh u MP wa da jop la le sien uwa man u kyrtong ka Congress, u Vincent H Pala, ka kyrtong ka NPP, ka Dr. Mazel Ampareen Lyngdoh, u kyrtong ka RDA, u Robertjune Kharjahrin, u kyrtong ka VPP, u Dr. Ricky AJ Syngkon wa ki kyrtong samen wa kynthup ya u Prof. Lakhon Kma wa u Peter Shallam.
Na Tura won da em soo ngut ki kyrtong kiwa kynthup yaka MP wa katni, ka Agatha K. Sangma naka NPP, u Saleng A. Sangma naka Congress, u Zenith M Sangma naka AITC wa u Labenn Ch Marak kam u kyrtong samen.
Kiwa thap Vote ka jylla em ki waroh 22, 26, 567 ngut ki wow jied ya ar ngut ki MP Lok Sabha na Shillong wa na Tura haka 19 tarik uni u bnai.
Katkam ka thup wa da yoh naka chnat Election ka jylla, ka Shillong Parliamentary Constituency da em ko 14,00,411 ngut kiwa thap Vote katwa ka Tura won em ko 8,26,156 ngut.
Neibynta ka Shillong Constituency na kiwa thap Vote kiwa boon toh ki kynthai kiwa dapoi 7,16,643 ngut katwa ki chynrang em ki 6,83,766 ngut.
Ha Tura won ki chynrang da rap boon ki kiwa em 4,15,751 ngut katwa ki kynthai da em ki 4,10,404 ngut.
Ki thaw thap Vote namo ki Polling Station ha waroh kawi ka jylla em ki 3512 tylli.
Discussion about this post