Ynne ka sngi wa le ka lympung yalehke Basketball neibynta kiwa 30 snem chaneiñ i rta ha Shillong kawa tip kam ka 1st Veteran Basketball Tournament wa pynman da ka East Khasi Hills District Basketball Association, da pynman 6 tylli ki yalehke yow yakhun psiah Semifinal.
Ha ka yalehke wa nyngkong hapyrdi ka Iaineh SC pyrchah ya ka 99 Problems da man ko ya thaiñ bha. Ka Iaineh da tam nyngkong ko ha ka First Quarter, tangwa ka 99 Problems lyngba u Gavin Deingdoh da ki 10 Point yong oo da ye ki wow wan nadien yow poi chakhmat ha Fourth Quarter ka yalehke.
Tangwa ka Iaineh ym em u khalær ko heiwa da ye ko wow pynjop ya ka 99 Problems da chi Point.
Ka Splash waka SYM toh kiwa em hakhmat ki Group yong ki ha ki yalehke ki kynthai wei ym pu em rem ki. Ka Eastern Range waka Nongstoin Ballers leh da yoh ki jop ynne ka sngi.
Kiwa jop ha ki yalehke ki chynrang:
Ka Iaineh SC (Dulon Kharsati 17 pts) da jop ki ya ka 99 Problems (Gavin Deingdoh 10 pts), ka Eastern Range (Wanrapborlang Laitmon 13 pts, Kevin 13) da jop ki ya ka Lumshyiap United (Wanbok Pyrbot 10 pts).
Kiwa jop ha ki yalehke ki kynthai:
Ka SYM (Yolinda 23 pts) da jop ko ya ka Sparkles (June Marai 10 pts), ka Splash (Rashmi Laloo 13 pts) da jop ki ya ka Jowai Ballers (Dikori 5 pts).
