Ka sorkar Sikkim hadien wa ha u Naichiphaw uni u snem da pynbna ko wa kam chibynta wow pynkyllooid yei khynnia kari ha ki thaw wa dang haap hapoh ka Gangtok Municipal Corporation (GMC), u pynkrehkaam noh da ka Odd-Even iwa man neibynta waroh ki kari ki bru samen kamjooh ki kari sorkar.
Uni da sdang i wow krehkaam nadooh myntu ka sngi wei krehkaam i hei bynta u National Highway nadooh Mayfair Fatak hadooh GICI, Zero Point nadooh 9:30 i step hadooh 12:00 waje pyrdi sngi wei nadooh 3:30 i sngi hadooh 6:00 waje i miet. Nadooh 12:00 waje pyrdi sngi hadooh 3:30 i sngi da pynlait u lai ki kari wa leh yei kaam wym hoi u dam kam kiwa kit marbaam wa kiwi de kiwa emkaam khlem da pait yei Odd-Even Number.
Ki thaw wa lait na kini ki kyndon kiwa dang haap hapoh ka Gangtok Municipal Area toh ka Indira By-Pass wa ka Northern By-Pass.
Ki jait kari wa lait na kini kyndon toh ki Ambulance, ki kari tympleh diñ, ki kari chna bordiñ, ki kari chna umkor, ki kari Telecom, kiwa pait ya ki dooid ki nala, ki kari lai sumaar kiwa hap wow chim ya ki Sticker na ka Home Department ka jylla.
Ki kari sorkar wa pynlait toh du kiwa ksoh ya ka kyrdan Additional Secretary chaneiñ.
Ki bru wa wan uiñke suwari da ki kari samen yong ki hi na baar ka jylla Sikkim ym chah ktah ki ha kini ki kyndon tangwa emkaam donhi wow pynyoo ki heiwon i thaw sah ki.
Waroh ki kari ar chaka wa ki Taxi wa Register hapoh ka Sikkim ym chah ktah ki ha kini ki kyndon Odd-Even.
Lada em kiwa bia, daw chah du soo tylli donhi ki kari wei ini toh deiwa paan bor chwa na ki pulit. Lada em won kiwa yap, daw chah hadooh 10 tylli ki kari ki bru samen deiwa yoh bor na ki pulit.
Discussion about this post