I psiah ka stat Digital Technology ha kti yong awjan waroh kiwa chong chnong ka India da wanrah ko leh i thok i chukor (Online Scam) wa boon jait heiwa katni da sdang ka thok wa thymme deiwa poi Phone na ki bru wa kam toh kiwa kreh ka Telecom Department ka sorkar pyrdi.
Kini ki bru da chim kabu ki khamtam ya kiwa da heh rta heiwa kawi ka bru kawa em 77 snem i rta kawa na Bengaluru kawa tip kam ka Lakshmi Shivakumar da chah thok ko hadooh Rs 1.2 klur.
Kani ka bru da yoh Phone ko na u bru uwa kam toh uwa na ka Telecom Department heiwa da ong u wa ka SIM Card ko toh kawa da pynemkaam ya kiwa boon ki kaam pyrchah aiñ ha Mumbai heiwa da kam u wa da yoh ujor pyrchah ya ka ha ka Mumbai Crime Branch.
Hadien kattu katni por da yoh Phone ko na ki bru wa kam toh kiwa na Mumbai Crime Branch heiwa da ong ki wa da pynemkaam ya i Phone Number ko yow pynlai ya ka poisa kawa Rs. 60 klur wei da paan ki ya ka Bank Account ko heiwa da phah ki leh ya ka FIR wa da ujor kamjooh ka Arrest Warrant yow kem ya ka heiwa da phah ki ya ka wow su ko Rs 1.28 klur deiwa ong wa daw pynuiñ won hadien wa kut ka takit.
Ini i jooh da jia sa ya kawi ka bru kawa na Chandigarh kawa da chah thok Rs. 72 lak deiwa pynemkaam yei jooh i buit deiwa maham wow kem ka heiwa kani ka bru won da yoh Phone ko na ki bru wa kam toh kiwa na Central Bureau of Investigation (CBI) wa em ha Andheri, Mumbai heiwa kini da kam ki wa da em ka Arrest Warrant yow kem ka.
Da phah leh cha kani ka bru ya kiwa boon ki kot ki sla wa da chna thok wow pynyoo wa da chah takit ko wei da chah pynbor ko wow su Rs. 72 lak deiwa kular wow pynuiñ biang hadien wa pyndep ya ka takit.
Neiliang ki bor ka aiñ da kyntu ki ya ki paidbah wym toh u ngait ya kam kini ki bru wei wow lai pyntip wut-wut cha ki pulit manda jia kamni.
Discussion about this post