U Montri sorkar, u James PK Sangma da sdang u ya ka Seed Bank Project kawa man kam ka thaw wow pynchlur yei pynlang wei wow pynneh yei chyieñ u jait khoo uwa da em la 6000 snem ha Sadolpara, West Garo Hills.
Yeini da leh deiwa ya krehlang waka NESFAS deilang waka ELP Foundation.
Neiliang u James Sangma da ong u wa da sdang yeini toh yow sñiawthooh iyi de wa ye u leh deiwa thooh bniah yow ye leh u rep deiwa rap heh, rap boon ya uni u jait khoo yow yarap ya kiwa chong chnong.
“Boon bha i kylla katni iwa da ktah ya ki jhoor, ki soh wa kiwi de iwa thung wa rep ki bru neidaw wa kylla ka suiñ bneiñ. Kam ha kini ki por da emkaam bha wow jied wei wow pynneh pynsah khamtam ya u khoo neibhah ki toh ki jait wa khlan wa ye bha wow yaleh pyrchah yei kylla ka rymaw wei kiwa ye leh u psa wei pyndap baam ya ki bru,” da ong u James.
“Kamwa man katni, boon na u khoo i wan u na ki jylla kam ka Andhra Pradesh, iwa da pynlut phut ya ka jylla. Wei uni u khoo ka Sadolpara toh uwa da neh da ki hajar snem, man u leh uwa miat wow baam kamjooh daw yoh myntoi ka Meghalaya leh heiliang ka poisa poilaiñ,” da ong chooh chooh u deiwa pynrap wa ini daw yarap ko leh wow pynku yei yoh i kot ka chnong ka thaw.
Uni u jait khoo hadooh katni dang chem ya oo ha ki chrooh ki loom ka Sadolpara wei ym toh uwa hap pynlut bor pynlut por wow sumaar yow heh u hawa nujor wa kiwi wa emkaam chiboon bha ka um.
Ya uni u jait khoo leh da pynchlur da ka International Fund for Agricultural Development (IFAD) deiwa ya krehlang wa kawa chna phlim, ka Mira Nair yow pynmih ya ka phlim Documentary ha u 2003 kawa da e pyrtuid ‘Still, the Children are Here.’
Tangwa hadien ini ym em de iyi iyi wa leh da ki sorkar wa da lai yow pynpawnaam ya uni u khoo.
“Ka NESFAS daw krehlang ko waka chnong yow pynkrehkaam ya kini ki Seed Bank. Wei daw man ki leh kyrpang ya u khoo kawa daw em ha Sadolpara neibhah uni u khoo toh uwa da rim nadooh ki por ka Sumerian Civilization. Da em 17 tylli uni u jait khoo katni ha chnong Sadolpara, heiwa 7 tylli toh kiwa da wiar ha ki snem wa da lai. Da yaleh u yaklam wa kiwi ki chnong wa em cha jan yow wanrah biang ya kitu kiwa da dooh yow pynmih biang yow em waroh 17 tylli ki jait khoo. I thong yong i toh yow pynneh ya ki chyieñ kamjooh i stat yong u warim wajah wa da wan lang wa uni u jait khoo,” da ong u James Sangma.
Ha kani ka sngi da emlang leh u Executive Director, NESFAS, Pius Ranee, ki warep ka Sadolpara, u Nokma, ki bru ka NESFAS wa ki dkhot ka ELP Foundation.
Neiliang kiwa chong chnong da pynyoo ki leh ya ka Dorua kawa man ka rukom khana parom chaphang u khoo.
