U Montri Kaam Pohyung warim kamjooh uwa yahkhmat wa da heh ka Congress, u HDR Lyngdoh da mih noh u kam u dkhot ka Congress.
U Lyngdoh da ong u wa kiwa kyrchaan ya oo da kwah ki wow yakhun Election MLA u ha u 2023 tangwa ym toh naka Congress.
Ka Congress kawa jop boon dooh ki MLA ha u 2018 kattæ ym em MLA de ko hadien wa da beh seiñ chipor ya ki 5 ngut ki MLA wa dang sah wei da mih leh boon ki heh ka Party.
U HDR Lyngdoh da ong u wa da toh i por ya ki Party Ri-loom wow wan noh hei bor hapoh ka jylla.
Da kdaw u leh yei dooh ka Congress ya 12 ngut ki MLA cha ka All India Trinamool Congress (AITC) wei da beh seiñ leh ya ki 5 ngut kiwa dang sah kiwa da lai kyrchaan ya ka Meghalaya Democratic Alliance (MDA).
Da ong u leh wa nadooh u 2010 ka jylla da yoh Montri Rangbah ko du na ki thaaiñ sepsngi ka jylla (Garo Hills) wei katni da toh i por ya kiwa yahkhmat ka Khasi-Jaintia wow yahkhmat ya ka jylla.
Da antaad wa u Lyngdoh uwa jooh mihkhmat ya ka Sohiong Constituency daw psiah u cha ka United Democratic Party ha kini ki sngi wow wan.
