Kam i dak wow burom ya u (L) Dominic War wei yow e yei stat i tip ya ki khynnah. U MDC ka Mynsngat Khanduli Constituency, u Dawan Lyngdoh da wai u ya ka Dominic English School ha chnong Namdong ynne ka sngi deiwa emlang u Principal ka Krist Syiem Sec. School Namdong, u Rev. Fr. Dominic Kympat, ki waheh chnong ka Namdong A wa B u Arki Sumer wa u D.S. War, u Secretary chnong u Shiningstar Thubru, u Constantin Thubru, u Chanbor War, kiwa ha yung u Dawan Lyngdoh wa kamjooh nadooh Headmaster ka skur, ka Queensina Suchiang, kiwa sikai skur, ki khynnah skur wa ki bei ki pa yong ki khynnah skur.
Katai ka skur toh kawa em hadooh Class V wei ha kani ka sngi u tre yong kani ka skur u Dawan Lyngdoh da pynsñiaw u yei kmen wa da pynmankaam yei angnood yong oo wow booh ya kani ka skur khnang wow ye u yarap ya ki khynnah kiwa wan na ki yung wa duna hei yoh i kot.
U MDC da ong u wa i em kani ka skur ym mut u wow chim kabu lane u man ko kam i khih tangwa yow yarap katwa ye wow chakri ya kiwa dooh wa duk kiwa chitom lyngba kani ka skur.
Kani ka skur da sdang ya ka nadooh u 2021 ha i yungwai wa chipor, wei ha uni u snem won da yoh ya ka yung wa pura yong ka hi.
Ha kani ka skur, ya ka bai skur ye ki bei ki pa wow e katwa sñiaw biang ki. Lait noh ki kot skur wa ki Uniform kiwa hap hi wow thied.
Kani ka skur em ko soo kamra wei da chna dei lut i sep u Dawan Lyngdoh hi.
