Jowai: Ka Iaw Pyngkat man ko kawi na ki yaw wa heh kawa psa yaki khon ki hajar yong ka Elaka Rymbai, kawa da sdang da ki le chnong ka Khliehriat, Dkhiah wa Deinshynrum wei nadooh u snem 1951, da wai yaka haka 16-09-1952, da u waheh Ïeng Suwer u Dolloi ka Elaka Rymbai. Ka sngi Iaw Pynkat toh kawa pynman ha Loom Saiñlong wei i thmu yong kani ka yaw toh wow chong dai da ki tre jylla neibynta wow yoh kamai kajih tangwa kamwa man katni, kani ka yaw da dap ko du da ki baar jylla.
Ynne ka sngi hadien wa kiwa yahkhmat ka seiñ Jaintia Student Movement (JSM), EJH, hadien wa yoh ujor hajrong wa boon ki baar jylla wa chong dai ha kani ka yaw, kiwa yahkhmat ka seiñ da lai ki cha kani ka yaw yow phah khang ya ki dukan ki baar jylla hapoh kani ka sngi yaw tangwa ha kiwi won ki sngi ki ye ki wow wai lait noh haka sngi yaw ka Iaw Pynkat, khnang wow yoh laad ki tre jylla kiwa wan na kylleiñ wow dai ha kani ka yaw kiwa kynthup ya ki Khasi, u Pnar, u Bhoi, u War.
Tangwa hadien wa da dep wow phah khang chipor ya ki dukan ki baar jylla da sepai noh ko hadien wa ki kattu katni kiwa kitkaam chnong deilang wa u waheh chnong warim ka Khliehriat kamjooh leh ki tre ne malik kiwa phah chong dai da ki baar jylla, da wan ki wow yaklam wa kiwa yahkhmat ka seiñ deiwa ong wa ki kamki tre wa e ya ki baar jylla wow chong dai ya ki ha ki dukan yong ki wei lada phah khang syndet syndet daw ktah ko yaka kamai kajih yong ki tre jylla.
Hawa yaklam, neiliang kiwa yahkhmat ka chnong wa ki tre dukan da kyntu ki ya kiwa yahkhmat ka seiñ wow paan bor chwa na ka chnong ha chwa wow phah khang ya ki dukan neibhah kiwa boon ki dukan toh yong ki tre jylla wei ki baar jylla toh kiwa chong dai ya ki tre jylla da ong ki tre dukan kiwa man ki tre jylla.
Tangwa neiliang ka seiñ da ong ki wa da dep ki wow e yei thoh cha ka District Council nadooh u snem 2018 heiyatoh wa kani ka yaw wow chong dai du da ki tre jylla, tangwa neiliang ka District Council ka ym chimkhia ko ya kani ka kaam, kamtæ ym yohsa wow pynyoo ya ka dak, khlem em iwon iwon i yumut wow pyndooh ya ka kamai kajih ki malik tre jylla kiwa em dukan ha kani ka yaw wei i thmu hi toh wym chah ya ki baar jylla wow chong dai du ha kani ka sngi Iaw Pyngkat tangwa ha kiwi ki sngi ki baar jylla ye ki wow chong katwa ngait ki.
Kamtæ neiliang kiwa yahkhmat ka seiñ da kyntu ki ya ka District Council wow leh ya iwa emkaam hajrong kani ka yaw wei neiliang ka seiñ daw lai yachem biang ko ya kiwa toh u pait yaka yaw ka haat khnang wow lai bait i chong dai ki tre jylla ha kani ka yaw.
Ka seiñ sa chisien ka kyntu ko leh ya ki tre jylla wa ki toh u e kaam e jaam næ wow phah chong dai da ki tre jylla hi, khnang wa ym mih kawon kawon ka kulmar.
Discussion about this post