U heh pulit wa da chah beh kreh chipor, u Gabriel K Ïangrai hadien wa da yoh jamin u nei chah pynbaad baam tooh hawa yatoh wa i pynkreh ya ka Nationwide Emergency Response System (NERS), ki pulit CID da lai ki wow kdong biang ya oo sa ha ki le tylli ki mukotduma wa da pynngat ya oo, tangwa ini i thmu wow kem biang ya uni u heh pulit da sepai hadien wa da yoh chwa u ya ka jamin hawa yatoh wa kitai ki 3 tylli ki mukotduma.
Katkam wa khana u muktiar yong uni u heh pulit, u Phuyo Yobin, da ong wa hadien wa da yoh jamin, u Ïangrai da lait u na patok ynnin i miet wei da yah noh ya oo cha yung, wei hadien wa ood chitom u, da pynkit noh ya oo cha Hospital yow phah sumaar ynne.
U Yobin da khana u wa ka mukotduma wa da chah kem u Gabriel toh hajrong i pynkreh ya ka Nationwide Emergency Response System (NERS), kawi ka mukotduma toh hajrong i saam ya ki marbaam ha ka chnat pulit, wei najrong ini da em sa 4 tylli ki mukotduma wei kawi toh hajrong i chah pynbaad baam tooh hawa thied ya ki kari pulit.
Hawa kylli, u Yobin da khana u wa hadooh katni u Ïangrai ym pu chah Charge Sheet u ha kawon kawon ka mukotduma, wei pynrap u wa ym ye u wow ong wa daw chah kem biang u neibhah kamwa man kattæ ym em de iwa da chah pynngat u.
