Ka Assam ha kini ki bnai wa da dep nadooh wa wan ka sorkar thymme wa yahkhmat da u Himanta Biswa Sarma kam u Montri Rangbah, da booh thong u wow pyndooh ya ki kaam pyrchah aiñ deiwa pynchlur leh ya ki pulit kiwa da dep wow siat yap ya palat 20 ngut ki snar ha ki kaam pyrchah aiñ wei da mynsoo palat 30 ngut.
Ynnin i miet won ki pulit ka Goalpara da siat yap ki ya ki arngut heiwa uwi da poi Hospital katwa uwi won dang thooh ya oo.
Katkam wa pyntip u DGP ka Assam da ong u wa kiwa tyngkheiñ ya ka aiñ mut ki jan ye ki wow leh chalak, u yut, u siat ya ki pulit tangwa ki pulit hi wow jop ha wakut.
Heiyatoh wa iwa jia ynnin da ong u wa ki ki pulit da kdong ki ya kini ki bru deiwa lai lyngba soo tylli ki Police Station iwa nadooh Krishnai-Dudhnoi-Mornoi-Goalpara heiwa kini ki damok da sait ki leh ya ki pulit.
Ki angut kiwa da chah sait yap toh kiwa tip kam u Rafajuddin wa u Basit Ali, u Rashidul Islam toh uwa da mynsoo katwa sa uwi da yoh u yut wei dang thooh ya oo.
Waroh kini toh kiwa da myllieñ wow leh ya kiwa boon ki kaam pyrchah aiñ wei kiwa da dep leh wow ngat ha ka aiñ ha ki kaam tooh, kaam lute.
Da yoh leh wow kem ya kawi ka suloi napoh ka kari wa pynemkaam ki. U tre ka kari toh uwa tip leh kam u Jiten Das, uwa da em chwa ha kti ki pulit ha Udalguri ya ki kaam tooh, kaam lute.
