Sngi laitlooid wa 75 ka ri India

Ka ri wa synchaar pynda u paidbah,
Ya u paidbah neibynta u paidbah;
Ka hok u im laitlooid kattu da yoh i ka,
Na kti ki dohlieh ha madan yong ka thma.

Kiwa chong chnong em ki boonjait boonskær,
Kam chipayu u man ham sñiaw yaphær;
Em leh boonjait ki niam wa ka ktien ka thylliej,
Ha kiwa atnood bichni duhai ham chah pynbiej.

U kynmoo warom ya ki bru yaleh wa khroo,
Neibhah yong ki man-u-snem da kynmoo;
Yei len idæ yong ki da ka snaam da bynda,
Tang wow yoh ka ri yei laitlooid wa pura.

Wym em ksiar næ rupa wow su kylliang ya phi,
Khon dap chynrang-kynthai ka bei khlawait ka ri;
Ya kiwa choon wa dusmon napoh ka ri u beh,
I pyrtuid wei naam yong phi chi rta da neh.

Kam kiwa chong chnong yong ka ri India,
Nadooh tre u nood ksooh yei mynsien maya;
Ham ya choon ya bichni para khon ka ri,
Yow suk ka mynried ka pateiñ yong i.

Ksoh yei kular kam ki paaid nong India,
Du chibuit chibor donhi ham yapiah yapra;
Yoh u nangku nangroi ka ri chaphrang,
Chakri dei miat dei bha ya ka imlang sahlang.

Kaamram yong uwi pa kawi u kyntu kynrong,
Yei burom yong ka ri u rah naam chajrong;
Dei akor wa bha u ya tule ya bood nuksa,
Sñiaw sarong ya idæ kam ki nong India.