U heh ka BJP uwa man leh kam u Montri sorkar, u Shanbor Shullai ynne da beiñ u ya ka Voice of the People Party (VPP) wa pyrchah ko yei wan u Chief Minister ka Assam kam u kongsan ha ka sngi pynkut ya ka lehniam Behdieñkhlam ha Jowai, deiwa ong wa ini i pyrchah toh iwa yoosarom wei deiwa leh ha i thaw wym toh u leh.
Hawa klam heiyatoh wa i dawa ka VPP na u Chief Minister ka Assam wa toh u pynbait chwa yei kajia pood, u Sanbor da ong wa ini ym em yatoh i wa i lehkmen ya ka dustur riti ki jaitbru Pnar.
“I sñiaw sarom i wa ka VPP pyrchah ko yei wan u Chief Minister ka Assam, u Himanta Biswa Sarma kam u kongsan ha kani ka lehkhmen wa khroo ki Pnar ha ka Behdieñkhlam. Nga sñiaw chutia O wa da dawa ki na u Himanta wa nyngkong hap wow pynbait ya u pood wei da man i daw wa pyrchah yeiwa wan u, neibhah kini ymtoh kiwa em yatoh iyi iyi leh,” da ong u Sanbor Shullai.
Da kdaw u leh wa i khut sñiawbha ya u Himanta da kiwa pynman Behdieñkhlam toh yow wan sakhi u ya kani ka riti dustur ymtoh wow wan yaklam ya ki kaam Politics.
“Kiwa pynman da khut ki ya oo yow wan sakhi ya kani ka lehkmen, tangwa wow pynman yei pyrchah nga sñiaw sarom O wei yoo chutia leh,” da ong u Sanbor.
Da ong u waroh ki Party deilang ki bru samen em ki yei hok wow pynsñiaw yeiwa kwah ki lada toh wa ka sorkar Meghalaya kamjooh ka sorkar Assam heiyatoh wa ki kaam kajia pood tangwa yeini ymtoh wow pynyatoh wa ki kaam dustur riti.
Da ong u leh wa da em ki laad ki luti wa da booh ka sorkar yow pynbait ya ini i kajia pood deiwa em ki Committee wei ka VPP ye ko wow lai yaklam wa kini.
Discussion about this post