Ka Environment Co-Ordination Committee yong ka Elaka Sutnga da pynsñiaw ko yei sñiawdiaw hajrong i chah kyrriah kaam noh u Deputy Commissioner ka East Jaiñtia Hills District, u E. Kharmalki (IAS) napoh ka District.
Ka Committee da ong ko wa ini i mih noh yong u DC da man ko i dooh wa khroo ya ka ECC yong ka Elaka Sutnga wa ya ka District hi waroh kawi neibhah man u u bru uwa chida wa uwa khooid ha i krehkaam yong oo, da man u leh u bru uwa yieñ ha ka yurim wa sakhiat wei uwa khlem noh chilliang hawa pait u ya ka District. Da man u leh uwa pdiang wei chah chkoor yei eh yong ki paidbah Elaka Sutnga.
Kamtæ kam ka ECC da sñiawsih ki hajrong i kyrriah kaam yong ka sorkar MDA ya u DC neibhah wa dang neh u du 14 bnai wow kreh. “Hei yong sakhiat ka samoi krehkaam yong oo toh u man ko ym duna ya 3 snem, tangwa da pynkut syndet syndet du ha ki 14 tylli ki bnai chwa wow toh i por.”
Heijooh i por da kitbok kitrwiang ya oo wow nang ye wow chakri rap bha ya u paidbah ha iwon iwon i thaw wa kreh u. Da booh leh hei duwai wa u Blai wow e u yei doh i pran wa chait wa khiah wow nang theh i kyrkhu ya ka yung ka sem yong oo waroh kawi.
Neiliang yong ka ECC wa ki khon yong ka Elaka Sutnga, da pynkynmoo biang ya ka sorkar lyngba u Montri Rangbah wow ksoh yei kular uwa da dep ong wa ka sorkar ym toh de u e ya ki kot ki sla wei da kyrpaad leh ya ka sorkar lyngba ka Expert Committee wow pyndep smat ya ka Inspection khnang wa u paidbah yong ka Elaka Sutnga wa ka District hi waroh kawi u lait ki nei chah ktah ha ki pumpum wa jakhlia kiwa mih na ki Coke Factory. Da kyrpaad leh ya ka sorkar wow chimkhia wow kdoh u khoom ya kitu ki karkhana Coke kiwa kreh pyrchah ya ka aiñ hadooh kini ki sngi.
