Ka KSU nadooh wa kut ka samoi man VC ka NEHU u KN Srivastava ynnin u snem, da lai yachem ko wa kiwa boon ki montri sorkar pyrdi yow dawa thung VC da u tre jylla iwa daw yarap wow kyntu ya ka puræ puthi yong ki tre chnong wei da uwa sñiawthooh yei emkaam ki Khasi wei da uwa man leh u Khasi.
Ka seiñ da ong ko wa lada ka sorkar pyrdi seiñ ko ya kawon kawon ka thaw puræ, i thmu man bait wow pynroi wei pynku ya ka puræ puthi ki tre chnong wei kamjooh wow pynyoh kreh ya ki. Wei yeini da sakhi ha kylleiñ ka ri India khamtam ha kitu ki thaw wa sah ki khian paaid wa dang sahdien. Kat wow yoo won ha NEHU, da duna palat i chakri ya ki tre ri tre chnong neibhah i bhah thaw puræ wa i e kaam e jaam ym man ko pura ya ki tre chnong. Wei nadooh wa da seiñ ya kani ka skurbah ha u 1973, da em du uwi u tre jylla wa man kam u Vice Chancellor utæ u B. Pakem (baam kwai ha dwar u Blai).
Da dep dawa leh nachwa wow thung ya u Dr. David Reid Syiemlieh wow man kam u VC ka NEHU tangwa da kheiñ skop hi-eh yeini. Ha kani ka kynti hadien wa da yoh yutip wa ka Selection Committee da jied ko ya Dr. SM Sungoh kam kawi na kiwa da yoo biang kyrdan. Ka KSU da phah ko ya ki dorkhat wei kamjooh leh da lai wow yachem ya ki MP wa ki Montri ka sorkar pyrdi yow kyrpaad na ki wei wow kyntu ya ka sorkar pyrdi wow jied bait ya Dr. Sungoh.
Du ha ini u snem da dep wow yachem ha Delhi ya u MP ka jylla u Vincent Pala, u Nominated MP ka Rajya Sabha u Rakesh Sinha, u Union Minister of Sports u Kiren Rijiju wa ya u Agriculture Union Minister u Narendra Singh Tomar heiwa da e dorkhat ya kini waroh wow kyrpaad wow yarap lang hajrong kani ka phang.
Tangwa ka sorkar da chet ko ym du ya ka KSU tangwa wot ya ka jylla waroh kawi deiwa thung VC biang da u bru uwa na baar ka jylla, da ong ka kyrwoh na u Donald V Thabah, General Secretary KSU wa na u Raymond Kharjana, Education Secretary KSU.
Puræ leh: Yoh VC wa thymme ka NEHU da u Prof. Prabha Shankar Shukla
