Da u: Shimphang Lyngdoh
East Jaiñtia Hills ka District wa khatwi
Ha pha da em chiboon ki Factory;
Ki khloo da kylla chei madan,
Cha suiñ su’i tdem wa yong ngeiñ.
Company boon jait da wan seiñ kaam,
Ya ka spah rymaw u kjit u baam;
Nei rong yirngam chei rong ktieh,
Sa katwon eh kynthai daw tah sñiooh khlieh.
Ka temperature nangku nangchit,
Neidaw wa joor palat i tngit;
Na khyndaw cha suiñ su’i jakhlia,
Cha ki wah ki liar yap lut ki dathli dakha.
Cheiwon u poi ka mynried u bru?
Ki laad ki luti yoosar kut kattu!
Hoi hi mo u ieh lyngkdang pyllup?
Ya i daw rkhai beiñ ka pyrthai chityllup.
Chwa u jæd u pra hi phum,
U yaleh da ka wait ne da u kulom?
Sñiawtieñ wow ap da paar wei snieh,
Kopsar wym em de wa nood u bahkhlieh.
Elaka Sutnga-Narpuh para thaaiñ wa maya,
Kamjooh ya warohlang ki nong East Jaiñtia;
To pyrkhat yillu chwa u sep ka sngi,
Ya boi u kylla ri chyiap chisien ka sngi.
To khyrngiat yongbru ham yohthiah yohdem!
Wow yaleh pyrchah ya kitai ki tdem;
Kawa booh hei maa ya ka pateiñ yong i,
Yow suk ka mynried ki khon ki kti.
(Ymtoh wa kynthoh pyrchah O, man du i kyntu wa khian tam wei smat O u paan maap lada man iwa bakla)
