Jowai: Ka seiñ HNYF lyngba ka khubor wa da phah da u Donbok Dkhar uwa man kam u Office Secretary ka seiñ da sñiawkhia ko yeiwa jia ha Mylliem heiwa da mih i awri awra hei yatoh wa i lai thang ya i metyap u Kulam Nongrum ha ka 11 tarik uni u bnai.
Da ong ka seiñ wa hei yoo yong ka ini man i i yasñiawthooh bakla hapyrdi ka para jaitbru weiwa da slem i yapynait hapyrdi ka Seng khasi Mylliem wa ka Dorbar Shnong Mylliem hei yatoh wa i thaw wada mang wow pyndep ya ki kaam thang.
“Kam kini ym jooh jia ha ka imlang sahlang ki jaitbru Khasi wei ymtoh u mylliñ i wa uni uwa da khlad toh u kñi u pa, u kha u man, u ma u pyrsa yong i kiwa dang im ha kani ka sla pyrthai” da ong ka seiñ.
Kamtæ ka seiñ da pynkynmoo ko wa kam ka jaitbru wa tip bru tip Blai toh u burom ya kiwa da khlad na kani ka pyrthai kamwa da sikai da u warim wajah.
Heijooh i por ka HNYF kyrpaad joor ko ya ka Dorbar Shnong Mylliem wa ka Seng Khasi hi waroh kawi wa toh u pynbait noh yeiwa emkaam kat dang smat neibynta i bha i miat ka jaitbru waroh kawi.
Discussion about this post