Ka seiñ Hynniewtrep Youth Council-East Jaiñtia Circle da sñiawkhia ko hajrong wym em kitkhia næ burom ki kattu katni tylli ki Bank, ki dukan rachon, Restaurant, ki karkhana, ki yung krehkaam ki bru samen, ki dukan dai dawai (Pharmacy), ki dukan nadooh kiwa heh hadooh ki dukan khian yaka hukum u DC ka East Jaiñtia Hills District wow booh pynemkaam ki da ka Register yow chim pyrtuid, ki thaw sah wa ki phone number ki bru wa wan thied (Customer) lane ya kiwa wan emkaam cha ki Bank lane ki yung krehkaam.
Chooh chooh ka seiñ da chem ko leh wa em ki dukan ki wym pynbiang wot ya ki Sanitizer, sabon wa ka um, wei ym em pynemkaam ki yaki Mask wa ki sap-kti leh kamjooh. Wei ini i kheinstiñ yong ki lane wym bood ki kam wa da phah da ka yung krehkaam u DC ka East Jaiñtia Hills, daw wanrah ko ya i maa haka imlang sahlang khamtam ha ini i por wa poor bha uni u khñiang COVID-19. Sa iwi leh man ko kawa eh bha wow leh yei booddien lane u leh yaka Contact Tracing lada ym em ka Register.
Kamtæ ka seiñ da kyrpaad joor ko ya u DC wow chimkhia u ya ini neibynta i bha i miat, yow ye u pyndooh ya i poor uni u khñiang COVID-19. Ka seiñ da kyrpaad ko leh yaki chnong waphær waphær kiwa em hapoh ka District u chimkhia ki u paitbniah.
Neiliang ka seiñ da kyrpaad ko leh ya ki dukan, ki yung krehkaam, karkhana, Pharmacy, Bank, skur wa College wa ya kiwi kiwi wow pynbiang ki ya ka Register, wa ya ki paidbah leh kiwa lai yaw lai haat, kiwa lai emkaam cha ki Bank, cha ki karkhana, wa cha ki yung krehkaam waphær waphær lane kiwa wan chim dawai wow pyndap ki ya ki pyrtuid, wa ya i thaw sah yong ki ha ki Register wa da booh kyrpang neibynta yong ki.