Jowai : Hadien wa ka seiñ JSU da dawa ko na ka JHADC wow thung noh ya ka Committee wow booh noh
ya ki dak thoh hei ktien Pnar da mih won ka khubor wa ong u Finance Secretary ka KSU Jaiñtia Hills Unit u Nangaibormi Sutnga wa kani man ko ka kaam wow tympiah jaidbru.
Hei yatoh weini neiliang ka Jaiñtia Students Union Shillong Circle ha ka khubor ka seiñ da ong ko wa ki kyntien na u Finance Secretary ka KSU JHU man ko kawa khlem nongrim.
“ileh du neidaw wa ka JSU dawa ko na ka JHADC wow pynskem wei wow pynneh yei ktien Pnar mut i iwa tympiah jaidbru mo?” da kylli ka JSU Shillong Circle.
Ka seiñ da ong ko leh wa i klam yong u ma Sutnga man i iwa ym sñiawsuk wei iwa pynsñiawsih ya ki paidbah ka ri-loom Jaiñtia neibhah boon hi lada ha Dorbar Chnong, ha yung ha sem namo kat hawa em da pynemkaam ki da i ktien Pnar. “Wot i kiwa sah ha Shillong leh la ha yung næ ha lait para i klam i dei ktien Pnar” da pynrap ka JSU SC.
“Ham sñiawthooh bakla i dawa i ya ki dak thoh Pnar man i iwa tympih jaidbru, tngwa kwah i wa ka ktien yong i u neh ko chi rta khamtam hapoh ka East Jaiñtia Hills District wa ka West Jaiñtia Hills District” da ong chooh chooh ka JSU SC.
Kamtæ kyntu kani ka Circle na u CEM, ki EM, ki MDC ka JHADC yow chimkhia ki wei wow pynsmat ki yeini i dawa ka seiñ JSU yow neh i naam i pyrtuid ka ktien Pnar neibhah lada im ka ktien im ka jaidbru Pnar.
Discussion about this post