Jowai: Ka Amkoi Sports Club kawa man ka Club ka chnong Amkoi kawa em kamwa 20 km na Amlarem, West Jaintia Hills District, ha ka 15 tarik wa 16 tarik uni u bnai da pynman ki ya ka Football Tournament kawa ar sngi kawa wan chimbynta da kiwa boon ki Club lehke Football yong ka thaaiñ Amlarem Sub Division.
Ya kani ka Tournament da wan wai da u Treiborlang R Suchen uwa man leh u President ka JSU (Shillong Circle) kam u kongsan wei da emlang leh u President ka Amkoi Sports Club u Dit Lamin, u Secretary u Teibor Pohlong, u Secretary chnong u Bar Pohti deilang wa kiwi ki waheh.
U kongsan hawa e yei klam ha kani ka sngi, da ong u wa kam u khynroo wa kreh sñiawbha ha ka kaam imlang sahlang, man u uwa smat wow yarap ya i eh wa ban wa chon ya ka chnong ka thaw wa ka thaaiñ hi waroh kawi, wei da kyntu u leh ya kiwa yalehke wow chim ya ki yalehke Sports kam ka kaam neibhah wa ha ka juk katni ha i dooh kaam dooh jam wa joor.
Da khana u leh wa ka seiñ da dep e dorkhat cha u montri ka chnat Sports ha u snem wa da dep yow paan ya ki Sports Complex kiwa biang neibynta ki District ha ri-loom Jaiñtia neibynta kiwa yalehke yow yoh ki u pynkhreh paka yow chah jied na ka jylla wow mihkhmat ha ka National Games 2022 kawa daw man ha Meghlaya.
Chooh chooh da ong u wa kam ka seiñ, sñiaw diaw ki neibhah wa ka sorkar warim ha i por ka Congress wa ha kani ka sorkar wa thymme ha i yahkhamt ka Party NPP ki da kyntait ki ya ka Jaintia Hills cha rood wow yoh pdiang lang ya ka lympung yalehke kawa heh ha u snem 2022. Ka sorkar ka kyntait ko ya ka ri-loom Jaiñtia toh neidaw wa ki ym yoh thaw ki wow chna ya ka Sports Complex kiwa biang ha ri-loom Jaiñtia.
Da ong u leh wa ka seiñ daw lai yachem biang ko sa chisien ya ka sorkar wow dawa bait wow yoh ya ka Sports Complex kawa biang ha ka thaaiñ Jaiñtia neibhah ka ri-loom Jaiñtia toh kawa da pynmih boon kiwa yalehke wa pawnaam kiwa da wanrah burom ya ka ri India wa ya ka jaylla waroh kawi.
Discussion about this post