Khliehriat: Ka JSU Khliehriat Circle lyngba u Publicity Secretary yong ka, u Edmund Sumer da sñiawkhia ko yei lait jamin u Hope Dong na ka chnong Lama uwa da slaitbor ya kawi ka khynnah kynthai kawa dang 8 (phra) snem i rta.
Ka seiñ da ong ko wa da chemdien ya ini i leh u Hope hadien chi snem tam wei da kem ya oo da ki pulit ha ka 10 Thohlakhmi (Feb) 2020 wei wa da pynngat leh ya oo ha ki kyndon aiñ.
Ka seiñ da pynsñiaw ko yei sñiawkhia iwa khroo wow tip wa du hadien kamwa 6 bnai uni u damok da lait noh u katwa da chimpor chi snem wow kem ya oo.
Kamtæ ka JSU hi da beiñ joor ko yei leh uni u damok (Hope) deiwa pynrap leh wow booddien ko yeini khlem chongngiah hadooh wa yoh kani ka khynnah yei hok yong ka.
