Ka kyrwoh na u SP ka South Garo Hills, Baghmara da ong wa hadien wa yoh yutip ki wa tikna, ki pulit ka District kiwa yahkhmat da u Sub-Divisional Police Officer, Chokpot da chem ki yaki kuli suloi na thaaiñ Chibokgre Aking kawa haap hapoh ka Chokpot Police Station.
Ya kini ki kuli da chem ha i miet ka 26 tarik uni u bnai hadooh wa kylla tarik deiwa thooh hapoh khloo wa em ha thaaiñ Chibokgre heiwa da chem ya kawi ka synduk wa em 85 tylli ki kuli ha heh (Large-Calibre Ammunition) kiwa da suba toh ki yong ka GNLA.
Ki pulit ka South Garo Hills District Police da kyrpaad ki ya ki paidbah wow ya krehlang waki pulit yow wanrah yei chongsuk chongsaiñ hapoh ka District kamjooh ha waroh kawi ka ri-loom Garo.
