Ka seiñ kiwa chong yaw wa tip kam ka Jaiñtia Tribal Traders Association (JTTA) lyngba u President yong ka u Iatha Najiar dap ko dei sñiawkhia hajrong i neh ki jhep da ki boon boon bnai kattu ha Iawthymme kawa mantre daka Jaiñtia Hills Autonomous District Council wot hawa kiwa chong yaw su bait ki yaka dan man-ka-sngi.
Da pyntip u wa neiliang ka Council lyngba ka chnat Market da kyrpaad ko ya kiwa chong yaw wym hoi u noh taroi yei jhep ha kani ka yaw, wei kiwa chong yaw leh da e ki yei yakrehlang katwa ye wa lah.
“Chisien wada ong ka yaw, da sñiawthooh wa i jhep ym dam de u mih. Hanla kiwa chong yaw da e ki yei krehlang leh, tangwa kat da ka yaw man iwa eh won wow khang ya kiwa wan yaw wan thied wan pet,” da ong u Iatha.
Kamtæ ka seiñ booh ko i kyrpaad yaka Council kamjooh ki bor District wow chimkhia ki ya kani ka kaam khnang yow lait nei kjut wa boon rukom la jia wa neh slem i jhep.
