Khliehriat: Ka Seiñ Southern Border Youth Welfare Association (SBYWA), Elaka-Rymbai & Lakdong, East Jaiñtia Hills District, da pynsñiaw ko i sñiawkhia yei jia ha ki thaaiñ khappood Bangladesh khamtam ha thaaiñ Dawki heiwa arngut ki chi kur da chah dat chah bom ki ha ki nong Bangladesh ha ka miet ka 4 tarik ha neiñ ka Laad Darrang wei jia ha chnong Amdoh.
Ki arngut wa tip kam u R. Khonglah wa u T. Khonglah heipor wa dang wan li booh bru ki na Dawki ya kiwa wan bia na kiwa man hayung ki ha chnong Lamin, manda poi ki ha hajan Laad Darrang da em wa khang ya ka sarok da ki moo wei da wan ki damok wa rah da ki wait kiwa da dat tympiah ya ka kari wei da sai ki ya ki arngut wa em napoh kari wei da choh da pam ya ki da ka wait hadooh wa da jan dooh ki yei mynsien.
Da suba leh wa ye u em palat ya 8-9 ngut kini ki damok neibhah heipor wa wan nyngkong kawi ka kari wow lai thooh ya kini ki bru na ini i thaw wa jia da chah pakhot moo ki kamjooh da suba leh kini ki jooh hi ki damok da thmu ki wow lute ha chnong Amdoh heiwa u Pratap Bareh da yaleh u wow lait im na kti yong ki.
Kamtæ ka seiñ da kyntu ko ya ki bor yong ka aiñ wow chimkhia wow leh yeiwa emkaam wei da kyntu ko leh ya ki pulit kamjooh ya ki BSF wow pynjoor yei sonteri ya ki luti ki syngkieñ kam ha kini ki por khamtam wow sonteri ha ki waroh ki thaaiñ khappood yong ka thaaiñ Dawki.
Heijoooh i por ka seiñ daw yachem ko wa ki bor watoh u pait ya ka aiñ yong ka District (SP & DC East Jaintia Hills) neibynta u chimkhia khnang wow pynman ya i sonteri ha ka thaaiñ khappood kynthup ha ki chnong Borgkhat- Kwator wa Hingaria heiwa da suba joor wa em i wan psiah i mih ki dkhar Bangla, i khayi pyrchah aiñ lyngba kani ka thaaiñ kawa daw booh hei maa hadien habood.
Kani toh katkam ka wyrta lyngba u S. Shadap President SBYWA-EJHD.
Discussion about this post