Ka Synjuk ki Waheh Chnong-Iooksi Saphai Circle ynnin ka sngi da e dorkhat ki ha u Superintendent of Police ka West Jaiñtia Hills wow kyrpaad u chimkhia hajrong i chah rahbor kiwa kamai kari ha Ri-loom Jaiñtia.
Ka synjuk ha ka dorkhat da kdaw ko wa u Damehipaia Papeng na Khonchnong uwa chongkha ha Mihmyntdu uwa da chah rahbor u ha ka 10 tarik uni u bnai wei hadooh ynne ka sngi ympu chemdien ya oo.
Da ong ko wa u Papeng da mih kamai u ha i step ka 10 tarik na Jowai cha Ladrymbai khlem liwan yung de. Chooh chooh da ong wa da ujor ha Jowai Police Station hajrong ini iwa jia ha ka 11 tarik wei da chem wa da lai u palat ka Lumshnong Toll Plaza ha ka 10 tarik heipor kamwa 2:00 waje i sngi.
Heijooh i por da kdaw leh wa ha ki ar bnai wa dadep da em kam ini i jia wa wiar ki bru napoh Ri-loom Jaiñtia, kamtæ da kyrpaad joor ya ki pulit wow leh yeiwa emkaam katkam ki kyndon ka aiñ wei kamjooh leh wow yada ya kiwa boon na kam ini i jia ha ki por wow wan.
Kam wow kdaw heini wa sa uwi uwa kamai Tourist da ka Maruti Swift Dzire (ML-04D-1113) da chem yei metyap u ha ka 16 tarik uni u bnai na ki thaaiñ Mynkre ka East Jaiñtia Hills wei uni toh uwa chong chnong ka Larnai, West Jaiñtia Hills uwa tip kam u Fullmoon Kharsahnoh (25 snem). Da wiar u nadooh i por wa lai kamai u na Shillong cha Jowai.
Yei metyap da chem deiwa em kha hei bynta i khlieh, rdang wa i dur khmat katwa yei kti wei kjat da kdoh da u tylle.
Ka kari yong uni leh da chem toh kawa da lai lyngba ka Lumshnong Toll Plaza wei da yah da uwi won u bru.
