U montri rangbahdooh ka ri, u Narendra Modi da pynsñiaw u yei mynsien wa khia yeiwa jia ha nongbah Beirut, Lebanon ynnin ka sngi heiwa da pdung ki dawai iwa da wanrah yei dooh yei mynsien bru wa i mynsoo da ki hajar ngut.
Kam wow pynkynmoo heini, ynnin da em i pdung wa joor ha nongbah rood-duriaw, Beirut iwa da pynjæd tympra ya ki spah tylli ki yung ki sem wei da antaad wa da khlaad da ki spah ngut wei da mynsoo palat 3,000 ngut.
Ini i pdung da pynkhih i leh yei khyndaw hadooh 3.5 ha u Richter Scale iwa man yaryngkat wa u khmi wei i ood na ini i pdung da sñiaw chadooh ki thaw wa em 200 Km na ini i thaw wa jia.
Chooh chooh ini i pdung da tympiah i phrai ya ki 3 tylli ki thaw sumaar (Hospital) ha kani ka nongbah.
Da suba wa ini i pdung toh hadien wa kem diñ ki sboh dawai Ammonium Nitrate iwa em kamwa 2,700 ton ha kani ka sor rood-duriaw (Beirut).
