Ki pulit ka Mizoram du ha uni u bnai da yoh ki wow kem 13 ngut kiwa dai drugs nadooh i Heroin hadooh ki Methamphetamine heiwa kini kiwa dai drugs toh kiwa napoh Mizoram wa na Assam heiwa du hei miet ka 15 tarik uni u bnai heipor kamwa 11:00 waje heipor wa pynsangeh kari ki pulit ka Champai District da yoh ki wow kem 1.373 i Heroin na ki 3 ngut kiwa lai luti da kawi ka kari kamai Sumo kiwa mut wow lai cha Aizawl.
Kini ki le ngut toh kawi ka kynthai kawa da rah 1.339 Kg i heroin katwa kiwi ki arngut da rah ki mar 22 gram i Heroin.
Neiliang u N. Biren Singh, u Montri Rangbah ka Manipur da pynsñiaw u yei sñiawkhia wow yoo yeini i ku syndet i yoh kem drugs ha Mizoram deiwa ong wa oo da maad u hadooh katwon eh wow yaleh thma wa kiwa dai drugs hapoh Manipur.
Kamtæ da tyrwa u yei yarap ya ka jylla Mizoram wow yaleh pyrchah ya kini ki kaam khamtam ha ki khappood wym pu em kær wa kiwi ki ri.
Da ong u leh wa ha kam kini ki por, waroh ki jylla ka North East da hap ki wow chah yeiwa boon i eh i chitom neidaw wa em i drugs, kamtæ da khut lang u ya waroh ki Montri Rangbah ka thaaiñ wow ya tylli yow wanrah yei rukom krehlang wa biang yow jop ya kani ka thma pyrchah yei drugs yow yada leh ya ka imlang sahlang na kini kiwa khayi drugs.
Discussion about this post