Uwa chong chnong ka Khliehmyntriang, East Jaiñtia Hills District u Lektor Dkhar da pynsñiaw u yei wym sñiaw yahaap hawa ka West Jaiñtia Hills kawa em 5 tylli ki MLA Constituency da yoh ko 3 ngut ki Montri sorkar katwa ka East Jaiñtia Hills won kawa em 2 tylli ki Constituency ym em ko uwi leh u Montri sorkar wei ini ye ko wow wanrah wow rem kini ki ar ngut ki MLA ha u snem 2028.
Da ong leh wa lada pyndooh yei man Montri sorkar u Kyrmen Shylla toh u e won cha ka MLA ka Sutnga-Saipung, ka Santa Mary Shylla kawa kreh chitom neibynta ka Constituency ko kamjooh ya ka East Jaiñtia Hills waroh kawi.
Deiwa pyndooh chuki kamni da wanrah ko leh yei wym hun kiwa kreh ka Party UDP wa NPP ha East Jaiñtia Hills wei ye wow poi chei rem kini ki ar MLA ha u snem 2028. Ini i wym yoh chuki Montri sorkar ka East Jaiñtia Hills District pynyoo ko wa ka sorkar wa yahkhmat da ka NPP da mylliñ ko ya ka East Jaiñtia Hills District.
Heiyatoh wa ka UDP, u Lektor da ong u wa ka Party toh u pyrkhat ko ya u Nujorki Sungoh yow yoh u ya ka chuki Montri sorkar.
Kamtæ da ong wa ki heh Party toh u pynchlur ki ya ki bru yong ki kam chibynta wow pynkhreh ya ka Election MLA wa daw man.
Discussion about this post