Ka seiñ East Jaiñtia Mineral Supplier Export Import Association (EJMSEIA) da pynsñiaw ko yei sñiawkmen wa ka East Jaiñtia Hills kam ka District da yoh ko ya u ADC wa thymme da u G. Warjri hadien wa da yang la kattu katni bnai.
Neiliang u President ka EJMSEIA, u Wanshwa Nongtdu deilang wa ki kattu katni ki dkhot da lai ki wow pdiang burom ya uni u ADC deiwa kmen heiwa u President da khana u wa ki dkhot da kmen ki neibhah wa uni u sahep toh uwa tip bha chaphang ka East Jaiñtia Hills heiwa ha u snem 2015 da man u kam u BDO Block Saipung.
Kamtæ u Wanshwa Nongtdu da ong u wa em i chaniah bha ya waroh ki sahep wow kyntu ya ka East Jaiñtia Hills kam ka District kawa paawkhmat bha hapoh ka jylla, deiwa kyrpaad chooh chooh ya ka sorkar MDA wow nang phah chooh chooh ya ki sahep cha kani ka District neibhah wa dang duna bha ki sahep.
