Ka Thma U Rangli-Juki (TUR) da pynsñiaw ko yei sñiawkmen wa da krehkaam i yaleh yong ka seiñ wow sai pyrthai yei kaam baam-tooh hawa pynkrehkaam ya ka Saubhagya Scheme hapoh Meghalaya hadien wa ka Enforcement Directorate ynnin ka sngi da lai hiar syndet ko cha ka yung krehkaam ka MeECL wa em ha Lumjingshai, Shillong wow kem ya ki kot ki sla wa yatoh wa i pynkrehkaam ya kani ka Saubhagya Scheme.
I pynkrehkaam ya kani ka Scheme da mih i leh ha ka Preliminary Audit Report ka CAG kawa da kdaw yei boon i wym biang hadooh wa ki seiñ saiñhima hapoh ka jylla leh da dawa ki wow pynman da ka takit heiwa ka TUR da dawa ko wow pynman ya ka takit da ka CBI.
Hadien ini neiliang ka sorkar da chim noh ko ya ka chnat bordiñ na u James Sangma wei da kylliang leh ya u CMD ka MeECL u Arunkumar Kembhavi.
Ka sorkar yow pynhun ya kiwa boon da thung ko da ka Independent Inquiry yow takit yei rukom krehkaam ka MeECL nadooh i rukom thung kreh, i dooh nong wa kiwi de ha kini ki 10 snem wa da lai heiwa ya kani ka thakit da dep wow e cha ka sorkar wei hadooh kattæ ym pu em pynbna paidbah iyi em hapoh yong ka.
Kam wow pynkynmoo wa ka Thma U Rangli-Juki (TUR) da pynbaad ko wa da lute ka chnat bordiñ hapoh ka sorkar MDA ha Meghalaya khamtam i pynkrehkaam yaka Saubhagya Scheme kawa wan naka sorkar pyrdi neibynta wow pynpoi bordiñ cha ki thaw nongkyndong wa i pyndait ya u Smart Meter katkam wa da pynmih khubor da ki Association ka MeECL.
Neiliang ka TUR da pyntip ko wa katkam ki kot ki sla wa da yoh ko deilang i mih khubor da chem ko wa ini toh i baam tooh iwa heh dooh iwa da sakhi hapoh Meghalaya.
SAUBHAGYA
Ka Saubhagya toh ka Scheme kawa wan naka sorkar pyrdi yow pyntikna wa waroh ki manyung wa em cha palatsor yoh bordiñ ki wei kani ka Scheme toh kawa da wan heithaw ka Rajiv Gandhi Grameen Vidyutikaran Yojana (RGGVY) wa Deendayal Upadhyaya Gram Jyoti Yojana. Hapoh ka jylla, ka MeECL toh kawa pynkrehkaam yaka. Ka Contract yow pynkrehkaam yaka Saubhagya Scheme ha Khasi-Jaintia Hills (Eastern Region) da e cha ka Satnam Global Infra Projects Ltd, Delhi katwa neibynta ka Garo Hills (Western Region) da e cha ka Onycon Enterprises, Mumbai.
Ka TUR da ong ko leh wa i yathong kreh namo ka Competitive Bidding neibynta ki Contract toh du wow pynbiej bru donhi wei da booh kyndon yow yachah ya kitu kiwa da thmu chwa wow jop. Heiwa kiwa jop yaka Contract da booh dor ki wow thied ya ki mar hei dor wa syad bar ya i dor waka MeECL thied ko ya kini ki jooh ki mar hawa ka leh yei jooh i kaam yow pynpoi bordiñ cha ki thaw nongkyndong. Heiwa i dor ki mar da man i 70% na waroh i bai kreh.
Da e nongmuna kamni:
-I khyndaw-bilat iwa chongdor T. 360 chi churai da boh dor T. 857 (iwa ku da 138%).
-I dor chrot bordiñ wa chongdor T. 11,900 da thied hei dor wa T. 17,145 (iwa ku da 44%).
-Ki Transformer wa chongdor T. 43,500/88,320 da dai heidor T. 1,06,086/T. 1,88, 598 (iwa ku da 144%/113%).
Kamtæ da ong wa ini i bai dor mar da pynku da 90%-100%. Wei neidaw wym pu em pyndep yei kreh, kamtæ da man wa 20% ka poisa ka Scheme da neh ko wa ki Supplier.
Soubhagya Garo Hills (T. 270 klur)
I bai mar- T. 189 klur
Da baam-tooh- T. 99.5 klur
I bair kreh- T. 81 klur
Da baam-tooh- T. 54 klur
Soubhagya Khasi- Jaintia Hills (T. 255 klur)
I bai mar- T. 178.5 klur
Da baam-tooh- T. 89.25 klur
I bai kreh- T. 76.5 klur
Da baam-tooh- T. 51 klur
Waroh i baam tooh= T. 51 klur+ T. 89.25 klur+ T. 54 klur+T. 99.5= T. 293.75 klur
SMART METER PROJECT
Ka sorkar jylla da yaleh ko wow tyrwa cha ki paidbah wa ki Smart Meter daw yarap ki wow pyndooh yei dooh nong heiwa da em leh ka Scheme ka sorkar India kawa ong wa ki Distribution Company kiwa khut kam ki Discom da yarap ya ki wow kylliang ya ki Meter warim lyngba ka Company sorkar (PSU) kawa tip pyrtuid kam ka EESL (Energy Efficiency Service Limited) kawa pynkrehkaam ya ini heiwa ki Company wa yoh ya ini kreh u pynlut chwa ki yaka poisa naki kamtæ ki jylla ym emkaam ki wow e poisa chwa.
Ka EESL da dep soi soskular (MoUs/Agreements) ko neibynta ki Smart Meter kam ha Andhra Pradesh, Uttar Pradesh, Haryana, Bihar, NDMC-Delhi, Rajasthan, Telangana wei neibynta ki Prepaid Meter da dep leh waka Uttar Pradesh wa Tripura.
Kamtæ ka TUR da ong ko wa najrong wa em kani ka laad, ka sorkar Meghalaya won da rai ko wow chim daka ram wa T. 230 klur naka ADB yow su cha ka Company Satnam Global yow pynkrehkaam ya kani ka Project. Ka Satnam Global kawa man ka samen wa thong ya kani ka kaam da chah jied ko hanla da thong ko deiwa bakla yow pyndait ya kini ki Smart Meter ha i dor T. 9444 uwi u Smart Meter neibynta ki 207015 tylli ki Smart Meter.
Ini da man i iwa khyrngiat neibhah ka EESL hawa pynkrehkaam ko ya ini, i dor yong ka toh T. 2700 uwi u Smart Meter. Wei deiwa kheiñ sa ini, da yaphær i dor da T. 6444 iwa lada kheiñ deiwa du na i baam-tooh da poi sa T. 157 klur.
Deilang waroh da poi T. 450.75 klur ka poisa kawa ym ye u kheiñ tikna wei da man ko iwa heh dooh i pynemkaam bakla yaka poisa.
