Kiwa chong chnong ha Moolephaw chirup waka Lum Lyngdoh ki wa em ha ka thaaiñ Nongjngi, West Jaiñtia Hills District dap ki dei sñiawngooh wa khroo ya ka Rama Krishna Mission (RKM) Sohra kawa da wan e yarap ynnin ka sngi da u khoo wa u dai cha ki kattu katni ki manyung kiwa emkaam yarap, heiwa da em kamwa 70 tylli na Moolephaw wa 75 tylli na Lumlyngdoh kiwa da yoh yarap.
Ini i e yarap ka Mission da man sakhiat iwa kordor hadooh kattæ kattæ ha kam ini i por wa em ka Khlam COVID-19 hapoh ka ri heiwa kiwa chong chnong kiwa dooh wa duk da em ki ha pyrdi i im kordit heiyatoh wa i baam i dih neidaw yong kani ka khlam.
Ya ini i e yarap da yahkhmat da u Manbha Lyngdoh hei emlang ka G. Majaw wa ki dkhot yong ka RKM.
Ha kani ka sngi da em ka yalang wa tbian heiwa u Manbha Lyngdoh hei klam wa tbian yong oo da ong u wa ini toh i thmu wow yarap ya kiwa dooh wa duk ha ki thaaiñ palatsor ha kini ki por wa em ka khangsbak heiwa waroh ym yoh de u lai khih lai kreh. Da ong u leh wa ka RKM da pynyaar ko yei e yarap yong ka wot heiliang i chait i tram.
Da ong chooh chooh u wa kani ka e yarap toh du i bor yong ka Mission dohni.
Ha kani ka sngi da e ya ki marbaam deiwa bood ryntih ya ki kyndon wa da booh ka sorkar wow yada nei poor ka khlam COVID-19 deiwa pynjngai iwi na iwi wei wow sap ya ki Mask.
Hajrong ini i e yarap neiliang kini ki ar chnong da pynsñiaw ki yei mynsien sñiawngooh wei da e khublei kitbok kitrwiang ki ya ka RKM Sohra wa ya ki dkhot yong ka wow yoh ki dei chait i khlan wei wow nangku ki chaphrang hei wow e chakri ya ka imlang sahlang hapoh ka ri.
