Ka chnong Sohphoh kawa haap hapoh ka West Jaiñtia Hills District, Meghalaya da pynsñiaw ko yei sñiawngooh wei e khublei kyrpang ya ka Ramakrishna Mission Ashrama Sohra kawa da e yarap ya ki manyung wa dooh hapoh ka chnong ha ka 19 tarik uni u bnai.
Ha kani ka sngi, ka kynhun hapoh i yahkhmat u Manbha Lyngdoh wa pait ya ka Ramakrishna Mission ha Jaintia Hills, da wan ki wow saam da u khoo wa u dai cha ki 40 tylli ki manyung wa dooh hapoh ka chnong Sohphoh.
Neiliang u Waheh Chnong ka chnong Sohphoh u Mutshwa Thabah da pynsñiaw u yei sñiawngooh wa khroo ya ka Ramakrishna Mission kawa da e sñiawbha cha ki bru wa dooh ha kam ini i por wa ki bru da yachem yei eh neidaw i khangsbak naka khlam COVID-19.
Neiliang ka chnong da e ko yei kyrkhu kyrdoh wa i kitbok kitrwiang ya ka Ramakrishna Mission wow nang ku na i por cha i por, weiwa u Blai u e u yei stad wei chemphang ya kiwa yahkhmat wa kiwa pynlai ya ka Mission wow nang ye chooh chooh u e ya ki kti yarap cha ki bru kiwa emkaam wei kiwa kyrdooh.
U Secretary ka chnong Sohphoh, u Foster Kharsahnoh da e khublei u ya kiwa yahkhmat ka Mission kiwa da kreh chitom wow thooh laad kammon wow yarap ya ki bru wa dooh ha kam kini ki por wa emkaam bha wei da yoh ki wow e yarap ya ki manyung wa dooh wa duk ha chnong Sohphoh.
Ha kani ka sngi da emlang leh ki bru rangbah kam u E.G. War, u S. Bhoi wa kiwi de kiwa ya synran lang ya ka kynhun e yarap ka Ramakrishna Mission.
