U MLA ka Jowai Constituency u Wailadmiki Shylla ynne ka sngi da wai paidbah u yaka thaw pynmih læ-er riñ mynsien namo ka Oxygen Plant kawa em ha MCH, Panaliar Jowai kawa da chna kyrpang hajrong ka yurim wow yarap ya ki bru wa emkaam Oxygen hawa chitom na u COVID-19.
Ya kani ka Oxygen Plant da chna chirup i krehlang wa ka United Nations Development Programme wa i yarap na ka ri Japan.
Ha kani ka sngi wai da emlang leh u Saron Paswet, EM ka JHADC kam u symbood kongsan, u Octomewot Lamin Nominated MDC, JHADC, ka Dr. R. Pohrmen Medical Superintendent Jowai Civil Hospital wa kiwi de ki Doctor deilang wa ki wakreh ka chnat i chait i khiah haka yalang wada pynlai da u Deputy Commissioner ka West Jaiñtia Hills u Garod LSN Dykes.
U Wailadmiki hawa e yei klam da ong u wa ka West Jaiñtia Hills man ko kawa embhah kawa man kam kawi na ki District wa yoh ya kani ka Oxygen Plant wei ini da man i iwa jop deiwa chimkhia ka sorkar jylla wow chna ya ka hapoh ka District.
Da ong u wa ha ka la-ær wa ar kani ka khlam COVID-19, em kamwa 51% na kiwa chitom kiwa emkaam ya ka Oxygen wei i em kani ka Oxygen Plant da man i i kyrkhu ya ki paidbah ka District neibhah wa i e sumaar ha ki thaw sumaar ki bru samen man i iwa syad khamtam kam ha kini i por wa ymyoh ki bru wow lai li khih li kreh kamwa jooh.
Heijooh i por da kyntu haroh u yaki paidbah wow wan ki chakhmat wow chim yei tika yada na kani ka khlam COVID-19, neibhah wa hadooh katte ha waroh kawi ka pyrthai ym pu em chem ki yaki laad sumaar wa paka lait du ka laad yada donhi deiwa e tika.
Ban joor haroh u wym hoi u man ki bru wa ngait biej yaki khubor thok, tangwa toh u bichaar bniah yaki yukheiñ wa ka sorkar da lai luti ko, wei lada em i wym che, toh u yachem yaklam wa ki Doctor.
Kamtæ hajrong i ye wow pyndep ya kani ka thaw pynmih la-æ Oxygen, neiliang u Wailadmiki da e khublei haroh u ya waroh kiwa embynta hei wow pynmankaam ya kani ka Oxygen Plant.
