Kiwa chong chnong haka dong Moolari Jalyiah, chirup wa ki khon ka Seiñ Raij Chnong Khliehmyntriang, East Jaiñtia Hills District, ha ka 5 tarik uni u bnai dap ki dei sñiawngooh wa khroo hadooh kattæ kattæ ya ka Ramakrishna Mission Ashram Sohra, kawa da wan chakhmat wow e yarap da u khoo wa u dai cha ki 33 tylli ki manyung wa dooh wa duk haka dong Moolari Jalyiah wei kamjooh leh cha ki 40 tylli ki manyung hapoh ka Seiñ Raij Chnong Khliehmyntriang.
I yarap yong ka RKM da i marbaam da man sakhiat i iwa kordor hadooh kattæ kattæ kam ha ini i por wa ban ka khlam COVID-19 hapoh ka ri ka muluk ha pyrthai hi waroh kawi, heiwa ki paaid wa chong chnong khamtam ki manyung wa dooh wa duk em ki haphyrdi i kordit heiyatoh wa i baam i dih.
Ya kani ka yarap da yahkhmat da u Manbha Lyngdoh hei ya emlang u Maharaj ka RKM, ka G. Majaw waki dkhot yong ka RKM. Yeini da sakhilang da u Phrangki Siangshai Secretary Dong (Club) Moolari Jalyiah, u Harvis Phawa kam u Asst. Secretary, u Phim Phawa uwa sdang (Founder) yong kani ka dong, u Dining Phawa deiwa emlang kattu katni ngut ki dkhot yong ka dong.
Hachwa wow sdang wow saam ya ki marbaam, da yoh i klam e khublei wa tbian na u R. Harvis Phawa uwa man kam u Assistant Secretary ka dong Moolari Jalyiah. Hei klam yong oo da e u i kyntien pdiang burom wei sñiawngooh yaka RKM kawa neipor cheipor jooh wan e yarap ko cha ki paaid wa chong chnong da ki marbaam wa da ki sula ki that. Da e u leh i kyntien kitbok kitrwiang yaka RKM khnang yow ye ko wow chakri ya ki kaam wa bha hapoh ka ri hi waroh kawi wei kamjooh ya kiwa kitkaam yong ka Mission khamtam ya u Manbha Lyngdoh heiwa hei yahkhmat yong oo dapoi sakhiat ki yarap cha ki dong ki thaaiñ yong i, e wa u Blai Trekirod Kynrad wow nangtheh u yei kyrkhu kyrdoh ya ki yow nang ye ki wow kreh yei kaam wa bha.
Neiliang u Joining R Dkhar da ong u wa ka RKM man sakhiait ko ka Mission wa em ka Vision kam i pyrtuid kam i kaam.
Neiliang kini ki arngut kitæ u R.H. Phawa, Ex-Waheh Chnong Jalyiah wa u J.R. Dkhar, Ex-Waheh Chnong Khliehmyntriang da ong ki dang em chiboon ki manyung mansem kiwa dooh wa duk wa dang emkaam kam ini i yarap hapoh ka chnong ka thaw, wei neiliang ka Mission hap ko wow yarap cha kiwi ki chnong kiwa ym ye ko wow e lut ha kani ka sngi.
Katwa kamtæ kyntu u ya ki paaid wa chong chnong wow ya ksohkti lang ki deiwa man ki kiwa yaichah neibhah ha kiwi ki por daw yoh ki yei yarap kamwa da yoo i wa ka RKM neipor cheipor pteiñ ko yei yarap cha ka chnong ka thaw yong i.
“Iwon iown i yarap heipor wa kordit man i iwa kordor tam wa phah da u Blai lyngba kiwa chakri yong oo cha ki khon yong oo wa emkaam yarap, khublei khublei chihajar ngooh neiliang yong i nang yai pyrta chula i yanom yanom yei burom wa sboon yong phi.”
Heipor wa saam ya ki marbaam da bood ryntih leh ya ki kyndon yong ka sorkar yow yada nei poor yong ka khlam deiwa pynyajngai uwi na uwi khamtam deiwa sap ya ka Facemask.
Tai chaphrang RKM imslem RKM pynkut ka kyrwoh Wyrta na kini ki arngut ki Ex-Waheh Chnong.
