Jowai: Heiyatoh wa i jia wa sñiawsih wa khlem poi pyrkhat wa jia ha ka chnong Lumshnong ha i thaw wa tip kam i Umsarang wa jia haka chi tarik uni u bnai heiwa kawi ka khynnah kynthai kawa tip kam ka Redina Lamare kawa em 17 snem i rta kawa dang puræ Class IX kawa da dooh yei mynsien du neidaw wa khalær wei wym chimkhia ki tre paar moochuni ya karkhana pynmih khyndaw-bilat ka Star Cement wow kær yada wei wow booh kam ki Signboard wow maham ya katai ka thaw wa em i ma.
Hajrong ini, neiliang ka seiñ Jaintia Students’ Movement (JSM) da dap ko da i sñiawsih kawa khroo wei ka seiñ leh da e ko ya ka khubor sñiawlem ya kiwa ha yung ha sem yong kani ka khynnah deiwa pynrem joor ya ini i jia kawa ym toh u jia lada chimkhia katai ka karkhana.
Hajrong ini wa jia u President ka JSM Central Body u Leningstar Rymbai da yoh u wow yaklam wa u Deputy Commissioner ka East Jaiñtia Hills wei neiliang u DC da pyntip u wa mar wa yoh yutip u ya iwa jia, da pynbiang lut ki wow pynsmat wow e yarap wei oo leh da lai u cha ka thaw wa jia.
Chooh chooh lyngba i yarap ka yung krehkaam u DC da phah ki ya ki NDRF wow yarap wow sai ya i metyap ha i step kamwa 6:00 waje ynnin ka 2 tarik.
U DC da pyntikna u leh ha u President ka JSM wa da pynkhreh wow phah ya i thoh cha ka sorkar jylla wow e ya ka yarap (Compensation) cha ka manyung kawa khlaad deiwa pynkhlan leh ya ka aiñ wow pyntikna yow lait na i tih roi ya u moochuni ki karkhana wa pynmih khyndaw-bilat wei kiwei leh toh u bood ki kam ka aiñ.
Ka seiñ da pynsñiaw ko leh yei sñiawngooh ya u DC wa chimkhia u ya kani ka kaam wei ka seiñ ka pynsñiaw ko cha ka sorkar jylla lyngba ka chnat Disaster Management wa pait da u Kyrmen Shylla wow pynsmat wow e yarap cha katai ka manyung yong ka Redina Lamare.
Discussion about this post