Ka National People’s Party Amlarem Block Constituency, hapoh i yahkhmat u Stephanson Mukhim (MLA warim) uwa man leh u President wa u Reachingson Kongwang, Secretary deilang ki chnat krehkaam ka Party, nadooh ka Parent Body, ka National People’s Youth Front, ka National People’s Women’s Front, ka National People’s Farmer’s Front wa ka Skill Development Committee da pynsñiaw ki yei sñiawngooh ya u Chief Minister, u Conrad K Sangma yeiwa da pynyoh u ya ki kaam pynroi ha ka thaaiñ uwa man leh kam u khliehdooh ka National People’s Party.
Da e khublei leh yei pynbna u wow e da ka Mini Secretariat ya ka Amlarem Sub-Division iwa waroh kiwa chong chnong da thrang bha ki najrong kiwi de kiwa da pynbna u kam chibynta ka lehkmen dap 50 snem ka Amlarem Sub-Division wa kynthup ya ka umbaam umdih, ki sarok, ki Scheme neibynta ki SHG, ki khynroo wa em yei sap, ki kaam uiñke suwari wa kiwi kiwi.
Neiliang ka NPP Amlarem Block da e ko leh ya ka dorkhat ha u Chief Minister heiyatoh wa i eh wa da maad ha ka thaaiñ nadooh i wym yoh khih yoh kreh ki khon khynroo khyllood wa kiwi de kiwa emkaam ka 7-Amlarem Constituency hi waroh kawi.
Ka NPP Amlarem Block da pynsñiaw ko leh yei sñiawngooh ya waroh kiwa yahkhmat ka Party kiwa da kreh chitom neibynta wow yaklam wa u Chief Minister ya iwa emkaam hapoh ka Amlarem Constituency neibhah wot hadien wa dap 50 snem ka Amlarem Sub-Division dang em boon i duna.
Da pyn-eh-daw leh ya u Chief Minister yow yoh u dei nang dei chait yow ye u nang kreh chooh ki kaam wa bha neibynta ka Amlarem Constituency wa ya jylla hi waroh kawi.
Discussion about this post