U Dr. R.C. Laloo, MLA warim ka Jowai Constituency uwa jooh man leh u Deputy CM ka sorkar jylla hawa pynsñiaw paidbah yei emlang u chirup hadooh kani ka kynti wow kyrchaan ya u Awhai Andrew Shullai kam u kyrtong ka TMC naka 2-Jowai Constituency, khana haroh u wa i rem u Andrew ha u 2018 toh iwa pynsñiawsih kthang tam ya oo bar yei por wa oo hi rem u ha u snem 1998 wa 2003.
“Nadooh u 2018 hadooh wym jooh klam paidbah de O næ mih lai cheiwon cheiwon leh wa joor i sñiawrem chawa palat neibhah sñiaw O kattu wym tip de kammon ka Jowai Constituency u man ko, neidaw wym yoh u Andrew u chong haka yung wa da dep pynmiat pynbha O haki 25 snem”.
“25 snem da chna O yaka Jowai Constituency kam ka yung yong nga deiwa chna pynmiat thij pa thij wei nga da chong ngiah O dei yooluti u yoh e kti ha u bru wa nga angnood O. Wym em de yakhun Election O dei ya sñiawthooh wa u Andrew wow yakhun u hei thaw yong nga neibhah yoo O toh u bru wa ye u sumaar wei pynbha chooh chooh yei yi wa nga da dep leh O,” da ong u Dr. R.C. Laloo.
Ong haroh u wa i sñiawsih wa maad sakhiat u wa rem u Andrew toh wa yaka yung wada chna u da wan da kiwi won ki bru ki wym em i sñiaw yajan wa oo wei ki wym ye u wow ya ong, yaklam næ yachem yumut.
Hawa kyruiñ won u hajrong i chah jied yong oo 5 sien naka Jowai Constituency, ong u toh wa ki paidbah yoo ki ha oo i kyrmen, kamtæ kyntu u yaki paidbah wow jied leh ya u Andrew Shullai neibhah ha oo leh em i kyrmen wow yah u hei luti wa bha.
Wym toh kam ha kini ki 5 snem wa dep nadooh u 2018 kat chawa pait iwa lait suda wei da mih leh i jia haka Jowai Constituency ki wym jooh pyrkhat u mynnu mynnu.
“Iyi wa jia ha kini ki 5 snem phi ki paidbah da sakhi hi phi, hawa u Blai e laad u wow chna yaki yung ki sem, e kti i ha ki khon ki kti wow sumaar ka yung wa nga chna O, da chimkti da u bru u wym toh kamwa nga mut O, wei heithaw u pynbna pynmiat u yaka yung wanrah pathan u dei jhep haphrang yung,” da pynrap u Dr. R.C. Laloo.
Ya kini ki kyntien da klam u ynne ka sngi ha pchem yung u Awhai Andrew Shullai kawa man leh ka sngi sdang yong oo yaka rynsan yalap Election MLA deiwa emlang chirup ki paaid wa kyrchaan yong u Andrew naki chnong waphær waphær, neitæ u Madonbai Rymbai, CEM warim ka JHADC, u Brightstar Chyrmang MDC Jowai North wa kiwi.
