U President ka MPCC, u Vincent Pala da pynsñiaw u yei sñiawskem wow jop na 30 tylli ki Constituency heiwa ka Congress Party daw pynyieñ kyrtong ko na ki 46 tylli ki Constituency.
Da pynksan u yeini deiwa ong wa ha ki yalang wa da pynman ha Mawphlang, Sohiong wa Nongthymmai ha kini ki sngi wa dep da yoo yei wan pdiang ki paidbah hanla ka Congress da pynyieñ ko da ki bru wa thymme.
Hajrong ini da ong u wa napoh napoh khlan ka lær ka Congress wei ka Party leh man ko kawa da pynkhreh wei da em ko ki kyrtong kiwa biang nadooh ka kyrdan puræ puthi kam ki Engineer kiwa da ieh yei kaam yow yaleh Election kamtæ da sñiawskem u wow jop na 30 tylli ki Constituency.
U Vincent Pala wa u Dr. Celestine Lyngdoh toh kiwa khlieh ya ka Meghalaya Pradesh Election Committee wei da dep ki wow rai khaddooh yei pyrtuid ki 46 ngut ki kytrong ki wow phah ka cha AICC yow e ko yei mynjur.
U Vincent da khana u leh wa da phah ya waroh ki kyrtong wow lai na iwi ha iwi i yung yow yalap Election, kamjooh leh da phah ya ki manbei wa ki khynroo wow leh ki kamjooh neibynta kani ka Election.
Chooh chooh da pyntip leh wa da sikai ya ki khynroo khyllood kammon wow pynemkaam ya ki rynsan Social Media yow kynjoh ktien cha ki paidbah.
