Ki ar ngut ki Montri Rangbah, u Himanta Biswa Sarma yong ka Assam wa u Conrad Kongal Sangma yong ka jylla Meghalaya da soi lang ki ya ka soskular wow pynbait noh ya u pood u ang hapyrdi kini ki ar jylla. Ya kani ka soskular da soi hakhmat u Union Home Minister, u Amit Shah ynne ka sngi ha nongbah Delhi deiwa ya emlang ki Montri yong ki ar jylla wa ki ar ngut ki Chief Secretary.
Kam wow kdaw heini wa ki ar ngut ki Montri Rangbah da ekti ki ya ka rai (Resolution) yong ki ar jylla cha u Amit Shah neibynta wow pynbait ya u pood u ang ha ka 31 tarik u Duyatra (Jan) khnang wa ka MHA u yoh ko wow bichaar bniah.
Katkam katai ka bui (Report) wa da ekti cha u Montri Kaam Pohyung ka ri, na ka 36.79 sq km i heh i thaw ha ka bynta kawa nyngkong ka yaklam, ka Assam u yoh ko 18.51 sq km, katwa ka Mehlghalaya u yoh ko 18.28 sq km.
Katkam ka khubor da pyntip wa daw em biang sa kawi ka yachem wa ka MHA hachwa wow soi won ya sa kawi ka soskular wa khaddooh namo ka Memorandum of Understanding (MoU) hapyrdi ka jylla Assam wa Meghalaya.
Neiliang u Amit Shah da ong u wa kani ka sngi toh kawa sahkynmoo ya ka thaaiñ mihsngi waroh kawi da ini i ya soi soskular wow ya pynbait pood hapyrdi ka Assam wa Meghalaya. Da ong u leh wa nadooh u 2014 u Modi da leh u chiboon ki laam pynroi ya ka thaaiñ mihsngi.
Kamtæ u Amit Shah da e khublei ya ki Montri Rangbah ka Assam wa Meghalaya wa waroh kiwa emkti yow poi cha ka kani ka soi soskular wow pynbait pood noh.
Chooh chooh da ong u wa kani ka kaam pynbait pood toh kawa da sah la 50 snem wei da ye wow pynbait chwa 6 na 12 tylli ki bynta wa ya kajai iwa da man wa da ye u pynbait 70% wei ya ki 6 tylli kiwa dang sah daw pynbait smat leh kamjooh.
U Amit Shah da kyntu u leh ya u Montri Rangbah ka Assam wow pynbait pood noh waka Arunachal Pradesh kamjooh waka Mizoram wa Nagaland.
Neiliang u Montri Rangbah ka Assam da ong u wa kani toh ka sngi wow sahkynmoo wei ha kini ki 5-7 bnai wow wan daw pynbait noh sa ya ki bynta wa dang sah wei u kreh neibynta wow pynman ya ka thaaiñ Northeast kam ka kor wa kreh yow pynroi ya ka ri.
U Conrad da pyntip u wa kattu ya kini ki 6 tylli ki thaw wa dadep u ya pynbait daw leh ya ka sorjamin (Survey) da ka Survey of India deiwa emlang waroh ki ar jylla wei hadien ini daw leh noh yei booh ya u pood.
Da e khublei u leh ya u Amit Shah wa da yahluti u wow pynbait ya u pood wa yakjai ha waroh kawi ka thaaiñ kamjooh ya waroh kiwa da emkti ha ini i kaam deiwa pynrap wa ynne ka sngi toh iwa sdang donhi.
