Ka sorkar jylla da phah ko ya ki bor District ka East Jaiñtia Hills wow lai takit wei pynsakhiat yeiwa em wa ong wa oor kawi ka krem tih mooyong kawa da tlep im ya le ngut kiwa kreh mylla tih mooyong (Rat-Hole Mining) ha ka chnong Thangskoo wa dang haap hapoh ka Umpleng OP.
U Symbood Montri Rangbah uwa pait ya ki kaam pohyung (Police), u Prestone Tynsong da pyntip u wa ka sorkar ym pu yoh ko yei tip wa tikna hadooh kattæ tangwa da phah ya ki bor District yow thooh ki lada toh iwa sakhiat.
U Prestone da pdiang u yei eh wow yakhun pyrchah yei tih mooyong pyrchah aiñ deiwa ong wa boon ki paar mooyong toh kiwa em cha khloo wa em cha kdong bha.
Katkam wa da poor ka khubor, ini da jia i ha ka tayaaw wa dep heiwa da em i jia wa oor ka krem mooyong wa tih pyrchah aiñ ha Thangskoo, heiwa da suba leh wa em le ngut kiwa kreh mylla kiwa da khlaad ha katai ka krem, tangwa ini wa jia da wiar i kamtu hadien wa kani ka krem tih mooyong da suki noh ko heiwa da phah ya waroh kiwa kreh mylla wow mih ki na katai ka thaw.
Ka tyllong khubor da ong ko leh wa in da jia i ha ka 4 tarik wei da sai ya ki bru wa chah tlep heipor 2:00 waje i step, wei ha ka sngi wa bood da pynthylli ya katai ka thaw wei da neh sa du ka Crane ha katai ka thaw.
Tangwa dang hap wow yang yow pynsakhiat wa heiwon wei kammon da jia ini waroh wei kamjooh kiyi kitæ kiwa yap.
Discussion about this post